الماتىنىڭ قاي جەرلەرىندە كوروناۆيرۋس جۇقتىرۋ ءقاۋپى جوعارى؟

COVID-19 ۆيرۋسىنىڭ «دەلتا» نۇسقاسى تەز جۇعادى.  

الماتى قالاسى سانيتارلىق-ەپيدەميولوگيالىق باقىلاۋ دەپارتامەنتىنىڭ باسشىسى جانداربەك بەكشين وڭىرلىك كوممۋنيكاسيالار قىزمەتىنىڭ باسپا ءسوز كونفەرەنسياسى بارىسىندا قالالىقتاردىڭ كوروناۆيرۋستى ءجيى جۇقتىراتىن جەرلەرىن، سونىمەن قاتار قاتەرلى توپتاعىلاردى اتادى، دەپ حابارلايدى Almaty-akshamy.kz. 

بۇگىندە جۇقتىرۋدىڭ نەگىزگى بەس ورنى بار، ولار: ساۋدا وبەكتىلەرى - 32%، وتباسىلىق بايلانىس - 16%، قوعامدىق كولىكتەر - 17،1%، بازارلار - 13%. جۇرتشىلىق ازىق-تۇلىك بازارلارىندا ءجيى  جۇقتىرادى - 9%. سونىمەن قاتار، قازىرگى شەكتەۋلى شارالار مەن ۇجىمدىق يممۋنيتەتىنىڭ ارتۋىنا وراي دەرتتىڭ 2-3%-عا  تومەندەگەنى بايقالادى.  

«تۇرعىندار اراسىندا ينفەكسيانىڭ كوبەيۋ سەبەپتەرى – بۇل ءالى دە كورىنبەيتىن بيولوگيالىق قاۋىپكە بايلانىستى حالىقتىڭ قىراعىلىعىنىڭ تومەندەۋىنەن، COVID-19 ۆيرۋسىنىڭ «دەلتا» نۇسقاسىنىڭ تەز جۇعاتىنىنان»، - دەدى مەگاپوليستىڭ باس دارىگەرى. 

سونداي-اق، جانداربەك بەكشين بۇقارالىق ءىس-شارالاردى وتكىزۋگە تىيىم سالىنعانىنا قاراماستان، زاڭ بۇزۋشىلىقتاردىڭ ازايماعانىن ايتتى. الماتىنىڭ كەيبىر تۇرعىندارى باس مەملەكەتتىك سانيتارلىق دارىگەردىڭ قاۋلىسىنىڭ تالاپتارىن ەلەمەي، توي، قۇدالىق، مەرەيتويلىق مەرەكەلەر ۇيىمداستىرۋدى توقتاتاتار ەمەس. جانداربەك  بەكشين مۇنداي شارالاردىڭ سالدارىنان قالا تۇرعىندارىنىڭ ءوز دەنساۋلىقتارىنا عانا ەمەس، جاقىندارىنىڭ ومىرىنە دە ءقاۋىپ توندىرەتىنىن تاعى دا ەسكە سالدى. 

سەبد باسشىسى قالا تۇرعىندارى ۆيرۋستىڭ تارالۋ تىزبەگىن قۇرۋدى جالعاستىرا وتىرىپ، قالا ماڭىنداعى اۋدانداردا جانە جالعا الىنعان كوتتەدجدەردە وتباسىلىق مەرەكەلەر وتكىزەتىنىن ايتتى. 

جالپى، جۇقتىرۋ 20 جاستان 39 جاسقا دەيىنگى جاستار اراسىندا جوعارى - 34%. بۇل ولاردىڭ ۇلكەن موبيلدىلىگىنە جانە يممۋنداۋ بەلسەندىلىگىنىڭ تومەندىگىنە  ءارى تىعىز بايلانىستا بولۋىنا بايلانىستى.

ءسوزىن قورىتىندىلاعان جانداربەك بەكشين ەپيدەميولوگيالىق جاعدايدى تۇراقتاندىرۋ جانە ءبىلىم بەرۋ ۇيىمدارىندا جاڭا وقۋ جىلىن قالىپتى رەجيمدە ۇيىمداستىرۋ ءۇشىن الماتىدا قولدانىستاعى شەكتەۋ شارالارى 31 تامىزدى قوسا العانعا دەيىن ۇزارتىلعانىن اتاپ ءوتتى. ول الماتىلىقتاردى ۆاكسينا سالدىرۋعا، وزدىگىنەن ەمدەلمەۋگە جانە Ashyq قوسىمشاسىن كۇندەلىكتى ومىردە قولدانۋعا شاقىردى.