قازاقستاندا 5G جەلىسى ەڭ الدىمەن ەلوردادا، سوسىن الماتى قالاسىندا پايدا بولادى.
ال وبلىس ورتالىقتارىندا 2023 جىلدان كەيىن ورناتىلا باستايدى، دەپ حابارلايدى Almaty-akshamy.kz ق ر ييدم باسپا ءسوز قىزمەتىنە سىلتەمە جاساپ.
5G ازىرشە الماتىنىڭ كەي ايماقتارىندا عانا قولجەتىمدى بولىپ تۇر. ولاردىڭ ءبىرى – قالا تۇرعىندارى ءجيى سەرۋەندەيتىن پانفيلوۆ كوشەسى. اباي اتىنداعى قازاق ۇلتتىق اكادەميالىق وپەرا جانە بالەت تەاترى مەن قاراساي باتىر كوشەسى ارالىعىندا 5G جەلىسىن ۇستايتىن ۇيالى تەلەفونىڭىزبەن ەڭ جىلدام ينتەرنەتتى سىناپ كورۋگە بولادى.
5G وسى اپتادان باستاپ مەدەۋدە ىسكە قوسىلادى. ونى مينيسترلىكتىڭ قولداۋىمەن وتاندىق ۇيالى وپەراتورلارىنىڭ ءبىرى قولعا العان. قالالىق سيفرلاندىرۋ باسقارماسىنىڭ سوزىنشە، مەملەكەت تەستىلەۋگە ارنالعان جيىلىك دياپازونىن ۇلعايتۋعا مۇمكىندىك بەرگەن. ال ارى قاراي جەلى ۇستايتىن اۋماقتى كەڭەيتۋ ۇيالى بايلانىس وپەراتورلارىنىڭ قولىندا.
الەمنىڭ 42 ەلىندە قولجەتىمدى بولعان 5G الدىڭعىسىمەن سالىستىرعاندا 10 ەسە جىلدام جۇمىس ىستەيدى. مامانداردىڭ ايتۋىنشا، 5G تولىق مەتراجدى ءفيلمدى ءبىر سەكۋندتا جۇكتەۋگە قاۋقارلى ەكەن.