الماتىنىڭ ورتالىق ستاديونىنا رەكونسترۋكسيا جاسالادى – قالا اكىمى
ورتالىق كوممۋنيكاسيالار قىزمەتىندەگى بريفينگ بارىسىندا الماتى اكىمى ەربولات دوسايەۆ «چەلسي» فۋتبول كلۋبىمەن وتكەن ماچتان كەيىن مەگاپوليستىڭ حالىقارالىق بەدەلىنە قاتىستى جۋرناليستەردىڭ سۇراقتارىنا جاۋاپ بەردى، دەپ حابارلايدى aqshamnews.kz
اكىمنىڭ ايتۋىنشا، ۋەفا كونفەرەنسيالار ليگاسى اياسىندا 12 جەلتوقساندا «استانا» مەن «چەلسي» اراسىندا وتكەن ماچقا شامامەن 21 مىڭ ادام قاتىسقان.
«ەستەرىڭىزدە بولسا، ءبىز كەشىرىم سۇرادىق. ماچ باستالعانعا دەيىن ستاديوننىڭ شىعىس سەكتورىنداعى التى قاتاردىڭ ارالىعى دەر كەزىندە تازالانباعان. بۇل ورتالىق ستاديون مەنەدجمەنتىنىڭ جۇمىستى تولىق اتقارماعانىن كورسەتەدى، سوندىقتان ءتيىستى شارالار قابىلداندى»، – دەدى ەربولات دوسايەۆ.
ول بۇل جاعدايدان ءتيىستى قورىتىندى جاسالعانىن، ءبىراق بۇل وقيعا ويىن ساپاسىنا اسەر ەتپەگەنىن، ءارى اعىلشىن كومانداسى نەمەسە ۋەفا تاراپىنان شاعىم تۇسپەگەنىن اتاپ ءوتتى.
«كەلەسى جىلى ءبىز ورتالىق ستاديوندى قايتا جاڭعىرتۋدى باستايمىز. ورىن سانى 32 مىڭعا دەيىن ۇلعايتىلادى. جاڭا ستاديون بارلىق ستاندارتتارعا ساي بولادى جانە جابىق فورماتتا سالىنادى. بۇگىندە جاڭا جۇيە بويىنشا ەرس-كەلىسىمشارتى («تولىق اياقتاۋ») اياسىنداعى دامۋ تۇجىرىمداماسى بەكىتىلدى. بۇل الاڭدا ەۋروپالىق جانە الەمدىك دەڭگەيدەگى جوعارى دارەجەلى كۋبوكتىق جارىستاردى وتكىزۋگە مۇمكىندىك بولادى. سونىمەن قاتار، مەن ستاديون باسشىلىعىنا ساپالى جۇمىس جۇرگىزۋ ءۇشىن قوسىمشا كومپانيالاردى تارتۋ قاجەتتىگىن تاپسىردىم»، – دەدى اكىم