الماتى قالاسىندا جاڭا قۇرىلىس ەرەجەلەرى مەن قالا قۇرىلىسى رەگلامەنتى ازىرلەندى. بۇل قۇجاتتار بويىنشا قالاداعى قۇرىلىسقا قاتاڭ شەكتەۋلەر ەنگىزىلمەك. بۇل تۋرالى الماتى اكىمى ەربولات دوسايەۆ ورتالىق كوممۋنيكاسيالار قىزمەتىندەگى بريفينگتە مالىمدەدى، دەپ حابارلايدى aqshamnews.kz
«مەنىڭ اكىم رەتىندەگى جۇمىسىم نۇكتەلىك قۇرىلىستى رەتتەۋدەن باستالدى. مەملەكەت باسشىسىنىڭ تاپسىرماسىمەن 19 نىسان انىقتالدى. كەيبىرىن سۇرۋگە، ال كەيبىرىن ساتىپ الۋعا تۋرا كەلدى. بارلىق ماسەلە شەشىلدى. جاڭا قۇرىلىس ەرەجەلەرى مەن قالا قۇرىلىسى رەگلامەنتىندە بۇل ماسەلەلەردىڭ ءبارى بەكىتىلدى»، – دەدى اكىم.
2022 جىلدىڭ باسىنان بەرى قۇرىلىسقا باقىلاۋدى كۇشەيتۋ اياسىندا الماتىدا 69 قۇرىلىس نىسانى تولىق نەمەسە جارتىلاي سۇرىلگەن، ونىڭ ىشىندە 26 تۇرعىن ءۇي جانە 43 تۇرعىن ەمەس عيماراتتار. نەگىزگى بۇزۋشىلىقتارعا قاجەتتى رۇقسات قۇجاتتارىنىڭ بولماۋى جانە كەلىسىلگەن ەسكيزدىك جوبادان اۋىتقۋلار جاتادى. مۇنداي نىسانداردى ءسۇرۋ تەك سوت شەشىمى بويىنشا جۇزەگە اسىرىلادى.
«ءبىز ۇلكەن جۇمىس اتقاردىق. قالا قۇرىلىسىنا قاتاڭ شەكتەۋلەر ەنگىزەتىن جاڭا ەرەجەلەردى ازىرلەدىك. بۇل نۇكتەلىك قۇرىلىستاردى، تاۋ بوكتەرلەرى مەن جاسىل ايماقتاردى يگەرۋ جانە اۋلالىق اۋماقتاردى زاقىمداۋدى بولدىرماۋعا باعىتتالعان»، – دەدى دوسايەۆ.
جاڭا ەرەجەلەرگە سايكەس، ابىلاي حان داڭعىلى مەن ءال-فارابي داڭعىلى اراسىنداعى اۋماقتا تەك ەرەكشە نىسانداردى قوسپاعاندا، بيىكتىگى 9 قاباتتان اسپايتىن تۇرعىن ۇيلەر عانا سالۋعا رۇقسات ەتىلەدى.
قۇرىلىس تەك قوعامدىق ماڭىزدىلىقتى نەگىزدەيتىن ساۋلەت-قالا قۇرىلىسى شەشىمدەرىنىڭ بولۋى، جوبانىڭ ەكولوگيالىق تۇراقتىلىعى مەن رەسۋرستاردى ۇنەمدەۋگە ارنالعان تەحنولوگيالاردى قولدانۋ شارتتارىندا عانا رۇقسات ەتىلەدى.
ۆواد-تىڭ وڭتۇستىك بولىگىندە، ءال-فارابي داڭعىلىنىڭ، ساين جانە جاندوسوۆ كوشەلەرىنىڭ بويىنداعى تاۋ بوكتەرلەرىندە، سونداي-اق 15 گرادۋستان اساتىن كولبەۋ الاڭداردا قۇرىلىس جۇرگىزۋگە تىيىم سالىنادى. تەرراسالار مەن تەحنيكالىق قاباتتاردى قايتا جابدىقتاۋ دا رۇقسات ەتىلمەيدى.
سونىمەن قاتار، الماتىدا III كلاستان تومەن تۇرعىن ۇيلەر سالىنبايدى. بارلىق كوپپاتەرلى تۇرعىن ءۇي كەشەندەرىن قابىلداۋ مەن پايدالانۋعا بەرۋ كەزىندە مەملەكەتتىك ورگانداردىڭ باقىلاۋ فۋنكسيالارى كۇشەيتىلەدى. ارحيتەكتۋرالىق-قۇرىلىس باقىلاۋ ورگاندارىنىڭ وكىلەتتىكتەرى دە كەڭەيتىلەدى.
جاڭا ەرەجەلەر قازىرگى ۋاقىتتا ساراپشىلار مەن قوعامنىڭ تالقىلاۋىنا اشىق قولجەتىمدىلىكتە. جىل سوڭىنا دەيىن ولار ءماسليحات دەپۋتاتتارىنىڭ قاراۋىنا ۇسىنىلىپ، 2025 جىلدىڭ باسىندا كۇشىنە ەنۋى مۇمكىن.
«ەگەر ءماسليحات جاڭا قۇرىلىس ەرەجەلەرى مەن قالا قۇرىلىسى رەگلامەنتىن بەكىتسە، ءبىز قالاداعى جۇمىس شارتتارىن ناقتى بەكىتىپ، رەتتەۋسىز قالعان تۇلعالاردىڭ تاۋ بوكتەرلەرىن يگەرىپ، زاڭسىز ۇيلەر سالۋ ماسەلەسىن شەشەمىز. بۇل، ەڭ الدىمەن، ولاردىڭ قاۋىپسىزدىگى ءۇشىن ماڭىزدى»، – دەدى ەربولات دوسايەۆ.