الماتىنىڭ ونكولوگيالىق ورتالىعىندا جىل باسىنان بەرى 2 مىڭعا جۋىق حيرۋرگيالىق وتا جاسالدى، ونىڭ 50 پايىزدان استامىندا بەينەەندوسكوپيالىق تەحنيكا قولدانىلعان، بۇل ناۋقاستىڭ اۋرۋحانادا بولۋ ۇزاقتىعىن قىسقارتىپ، وپەراسيادان كەيىنگى كەزەڭدى جەڭىلدەتەدى. بۇل تۋرالى وڭىرلىك كوممۋنيكاسيالار قىزمەتىندە وتكەن بريفينگتە الماتى ونكولوگيالىق ورتالىقتىڭ ديرەكتورى نۇرسۇلتان ىزباعامبەتوۆ ايتتى، دەپ حابارلايدى اlmaty-akshamy.kz.
ورتالىقتىڭ حيرۋرگيالىق بولىمىندە ءارتۇرلى حيرۋرگيالىق وپەراسيالار جاسالادى: گينەكولوگيالىق، ماممولوگيالىق، كەۋدە قۋىسى، ابدومينالدى، نەسەپ-جىنىس وتالارى.
ناۋقاستارعا كورسەتىلەتىن بارلىق ەم جوعارى تەحنولوگيانىڭ كومەگىمەن جۇرگىزىلەدى، بۇرىن ءبىزدىڭ ازاماتتارىمىز ول ءۇشىن شەتەلگە باراتىن.
وپەراسيالاردىڭ جارتىسىنا جۋىعى از ءينۆازيۆتى ادىسپەن جاسالادى، بۇل وڭالتۋ ۋاقىتىن قىسقارتۋعا جانە وتا بارىسىندا ۇلكەن تىلىكتەردى بولدىرماۋعا مۇمكىندىك بەرەدى.
الماتى ونكولوگيالىق ورتالىعى - وپەراسيالاردى اشىق ءارى لاپاروسكوپيامەن جاسايتىن قازاقستانداعى وزىق كلينيكالاردىڭ ءبىرى. وسى ماقساتتا ونكولوگيالىق ورتالىق بارلىق قاجەتتى جوعارى تەحنولوگيالىق قوندىرعىلارمەن جابدىقتالعان. ماماننىڭ ايتۋىنشا، ناۋقاستاردىڭ 30%-دان استامى اۋرۋ اسقىنا تۇسكەن كەزدە، ءۇشىنشى جانە ءتورتىنشى كەزەڭدەردە ەمدەلۋگە كەلەتىن كورىنەدى. بۇل ۋاقىتتا ەم ۇزاق ءارى بارلىق ادىستەردى قولدانا وتىرىپ جۇرگىزىلەدى.
سول سەبەپتى دە ساراپشى ەل اۋماعىندا تەگىن سكرينينگتەر جۇرگىزىلەتىنىن جانە ۋاقتىلى دارىگەرگە قارالىپ، الدىن الۋ تەكسەرۋلەرىنەن ءوتۋ كەرەكتىگىن ەسكە سالادى.
«قاتەرلى ىسىكتى بارىنشا ەرتە انىقتاۋ ونى ەمدەۋ مۇمكىندىگىن دە ارتتىرادى»، - دەپ ءتۇسىندىردى ىزباعامبەتوۆ.