الماتىنىڭ ونكولوگيالىق ورتالىعىندا قاتەرلى ىسىككە شالدىققان 15 مىڭعا جۋىق ناۋقاس ەم قابىلدادى
بۇل تۋرالى بۇگىن وڭىرلىك كوممۋنيكاسيالار قىزمەتىنىڭ بريفينگىندە الماتى ونكولوگيالىق ورتالىعىنىڭ ديرەكتورى نۇرسۇلتان ىزباعامبەتوۆ ايتتى، دەپ حابارلايدى اlmaty-akshamy.kz.
بيىلعى جىلدىڭ 9 ايىندا الماتى ونكولوگيالىق ورتالىعىندا 14615 ناۋقاس ەمدەلدى، بۇل وتكەن جىلدىڭ سايكەس كەزەڭىمەن سالىستىرعاندا 1359 ناۋقاسقا كوپ.
حيرۋرگيالىق بولىمدەردە 2000-عا جۋىق وتا جاسالدى، ولاردىڭ 50%-دان استامىندا بەينەەندوسكوپيالىق تەحنيكا قولدانىلدى، بۇل پاسيەنتتىڭ اۋرۋحانادا بولۋ ۇزاقتىعىن قىسقارتىپ، وپەراسيادان كەيىنگى كەزەڭدى جەڭىلدەتەدى.
تاۋلىك بويى جانە كۇندىزگى ستاسيونار جاعدايىندا 12 061 ناۋقاس حيمياتەراپيالىق ەم قابىلدادى. 24 مىڭنان استام كت جانە مرت ساۋلەلى زەرتتەۋى جۇرگىزىلدى. 793 ونكوناۋقاسقا ساۋلەلى تەراپيا ەمى جۇرگىزىلدى.
الماتىلىقتار ساۋلەلى تەراپيا ەمىن اقش-تا جاسالعان جوعارى ەنەرگەتيكالىق جەلىلىك ۇدەتكىش كومەگىمەن الاتىنىن ەستەرىڭىزگە سالامىز.
بۇل قۇرىلعى ساۋ تىندەردى قوزعاماي، يوندالعان بولشەكتەر شوعىن ىسىكتىڭ وزىنە تىكەلەي باعىتتاۋعا مۇمكىندىك بەرەدى.
«پروسەدۋرا اۋىرسىنۋسىز وتەدى. ساۋلەلەندىرۋ سەانسىنىڭ ءوزى نەبارى ەكى مينۋتتى الادى، ال قالعان ۋاقىت پاسيەنتتى ءارتۇرلى ارنايى قۇرىلعىلاردىڭ (فيكساتورلار، ماسكالار) كومەگىمەن ەمدەۋ ۇستەلىنە جاتقىزۋعا، سودان كەيىن ەم جاسالاتىن ايماققا ساۋلەنى باعىتتاۋعا جانە پروسەدۋرانىڭ ساپالى جۇرگىزىلۋىن باقىلاۋعا كەتەدى. ايتا كەتەتىنى، ساپانى باقىلاۋمەن تمد ەلدەرىندەگى ەڭ ۇزدىك ۇجىمداردىڭ ءبىرى – مەديسينالىق فيزيكتەر اينالىسادى. سونداي-اق، وسى جەلىلىك ۇدەتكىشتى قولدانىسقا ەنگىزگەلى بەرى، قالا تۇرعىندارى ءۇشىن ساۋلەلىك تەراپياعا كەزەك پەن ورتاشا كۇتۋ ۋاقىتىن قىسقارتۋعا مۇمكىندىك بەرگەنىن ەرەكشە اتاپ وتكىم كەلەدى. ءبىزدىڭ بولىمدە كۇن سايىن 80-گە جۋىق الماتىلىق ەم الادى»، - دەدى نۇرسۇلتان ىزباعامبەتوۆ.