حالىقارالىق قوناق ءۇي جەلىلەرىن تارتۋ ەسەبىنەن 2030 جىلعا قاراي قالانىڭ نومىرلىك قورىن 3 ەسەگە كەڭەيتۋ جوسپارلانۋدا.
بۇل تۋرالى «تۋريستىك برەندتىڭ نەگىزى رەتىندەگى تۇراقتى قوناق ۇيلەر» VI حالىقارالىق قوناق ءۇي فورۋمى بارىسىندا الماتى قالاسى تۋريزم باسقارماسىنىڭ باسشىسى عاليا توقسەيىتوۆا مالىمدەدى.
ونىڭ ايتۋىنشا، قازىرگى ۋاقىتتا الماتىدا ءبىرجولعى سىيىمدىلىعى 21 715 توسەك-ورىنعا ارنالعان 347 ورنالاستىرۋ ورىندارى بار. سونىمەن قاتار، قالا قوناق ۇيلەرىنىڭ تەك 8،3%-ىندا عانا 3-5 جۇلدىز ساناتى بار، بۇل جايلى تۋريستىك تاجىريبەنى قالىپتاستىرۋعا ىقپال ەتپەيدى.
بيىل جەكە ينۆەستيسيالار ەسەبىنەن "Qazaq Auyl" مەيرامحانالىق كەشەنى بار ەكو-قوناق ءۇي جانە 112 بولمەلى 4 جۇلدىزدى "Grand Mildom" قوناق ءۇيى اشىلدى. نومىرلىك قوردى كەڭەيتۋ ماقساتىندا قالالىق تۋريزم باسقارماسى تۋريزم سالاسىنا ينۆەستورلاردى تارتۋ بويىنشا جۇمىستى جۇرگىزۋدە. 2024 جىلى مەگاپوليستە 300 ءنومىرلى جاڭا اپارت-قوناق ءۇي جانە 90 ءنومىرلى قوناق ءۇي كەشەنى پايدالانۋعا بەرىلەدى، 872 ءنومىرلى تاعى ءتورت قوناق ءۇي سالۋ بويىنشا جوبالىق جۇمىستار جۇرگىزىلۋدە.
«بۇگىن ءبىز الماتىدا تۋريستىك اعىننىڭ بەلسەندى ءوسۋىن بايقاپ وتىرمىز. ءبىرىنشى جارتىجىلدىقتىڭ قورىتىندىسى بويىنشا قالا 972 مىڭنان استام ادامداردى قابىلدادى، ونىڭ ىشىندە 261 مىڭنان استامى شەتەلدىك، 710 مىڭى ىشكى تۋريستەر. مامانداردىڭ بولجامى بويىنشا، 2025 جىلى شەتەلدىك تۋريستەر سانى 600 مىڭ ادامعا دەيىن وسەدى»، – دەپ اتاپ ءوتتى عاليا توقسەيىتوۆا.
الماتىداعى حالىقارالىق قوناق ءۇي فورۋمى جۇمىس ىستەگەن جىلدار سالا ساراپشىلارى ءۇشىن ءتيىمدى ديالوگ الاڭىنا اينالدى. بيىل قوناق ءۇي يندۋسترياسى سالاسىنداعى باستى وقيعا قازاقستان، ءازىربايجان، گرۋزيا، گرەسيا، پولشا، فرانسيا، ءۇندىستان، كاتار، ءباا جانە سينگاپۋردان ساراپشىلاردى جينادى. فورۋمنىڭ نەگىزگى تاقىرىبى جەرگىلىكتى ءتۋريزمنىڭ ماڭىزدى قۇرامداس بولىگى رەتىندە قوناق ءۇي بيزنەسىنىڭ تۇراقتى دامۋى جانە ESG قاعيداتتارىنا بەرىلگەندىك بولدى.
سالا كوشباسشىلارى قوناقۇيلەردى سالۋ كەزىندە ەنەرگيانى ۇنەمدەيتىن تەحنولوگيالارعا كوشۋ، قوناق ءۇي قىزمەتكەرلەرىنىڭ ەموسيونالدىق ءال-اۋقاتىنىڭ ماڭىزدىلىعى، ءتيىمدى كورپوراتيۆتىك باسقارۋ ستراتەگياسى ماسەلەلەرىن قاراستىردى. پانەلدىك سەسسيالار بارىسىندا حالىقارالىق جانە وتاندىق قوناق ءۇي بيزنەسىنىڭ سوڭعى ۇردىستەرى، سونداي-اق ءتۋريزمدى دامىتۋدى ىنتالاندىرۋ تەتىكتەرى تالقىلاندى.