نەگىزگى جۇمىس اقجار ىقشام اۋدانىنىڭ 89 كوشەسىندە جۇرگىزىلمەك
الماتىنىڭ ناۋرىزباي اۋدانىندا 45 شاقىرىمدىق جاڭا جول سالىنادى. نەگىزگى جۇمىس اقجار ىقشام اۋدانىنىڭ 89 كوشەسىندە جۇرگىزىلمەك، دەپ حابارلايدى Almaty-akshamy.kz Almaty.tv-گە سىلتەمە جاساپ.
بۇعان دەيىن الماتى اكىمىنىڭ اۋدان تۇرعىندارىمەن بولعان كەزدەسۋىندە كوپشىلىكتىڭ كوڭىلىن الاڭ قىلعانى دا وسى جولدىڭ جايى ەدى. تۇرعىندار قالا باسشىسىنىڭ كوشەدەگى اياقتالماعان جۇمىستارعا ءمان بەرۋىن سۇراعان. بۇگىندە مۇندا 8 شاقىرىمدىق جول اسفالتتالىپ، 4 كوشەدە جاعداي جاقساردى. ەندىگىدە جوندەۋدىڭ ەكىنشى كەزەڭى باستالادى دەيدى اكىمدىك مامانى.
«ءقازىر ەكىنشى كەزەڭ بويىنشا جۇمىس اتقارىپ جاتىرمىز. جوسپارعا سايكەس، 13 شاقىرىم جولعا جوندەۋ جۇرگىزىلدى. جالپى قاراعايلى، قارعالى مەن شۇعىلا شاعىناۋدانى قامتىلادى»، – دەدى ناۋرىزباي اۋدانى اكىمدىگى ءبولىم باسشىسىنىڭ مىندەتىن اتقارۋشى وڭالبەك قىدىربايەۆ.
جول عانا ەمەس، الاڭقايلار مەن سپورت الاڭدارىنىڭ دا جاعدايى جاقسارماق. ماسەلەن، اقجار شاعىناۋدانىندا 10 مىڭ شارشى مەترلىك ساياباق جوندەۋدەن وتكەن.
«ساياباقتاعى جۇمىستار بيىلعى ماۋسىم ايىندا باستالعان ەدى. بۇگىندە 95 پايىزىن اياقتادىق. ءقازىر وزدەرىڭىز كورىپ تۇرعانداي، اعاش وتىرعىزىلىپ جاتىر. جوسپار بويىنشا، بەينەباقىلاۋ كامەرالارى دا ورناتىلادى»، – دەدى ناۋرىزباي اۋدانى اكىمدىگى ءبولىم باسشىسىنىڭ مىندەتىن اتقارۋشى وڭالبەك قىدىربايەۆ.
«جاڭا ساياباقتىڭ سالىنعانىنا قۋانىشتىمىز. بۇرىنعىسى اۋماعى بويىنشا كىشكەنتاي ەدى. تۇرعىنداردىڭ بوس ۋاقىتتا دەمالاتىن، قىدىراتىن جەرى بولعانى جاقسى عوي»، – دەدى ناۋرىزباي اۋدانىنىڭ تۇرعىنى اسلان ءىلياسوۆ.
«ساياباق ارينە، جاقسى. اعاش وتىرعىزىلىپ جاتقانى قۋانتادى. اۋا تازارادى، اينالامىز ادەمى بولادى. بالالار دا قۋانىپ ءجۇر»، – دەدى ناۋرىزباي اۋدانىنىڭ تۇرعىنى اللا گونتار.
اۋدان تۇرعىندارى قالا باسشىسىمەن كەزدەسۋدە بالالارعا ارنالعان الاڭداردىڭ جوق ەكەنىن دە ايتقان ەدى. كوپ تىلەۋىنە سايكەس، ءقازىر قالقامان شاعىن اۋدانىندا سپورت الاڭقايلارى مەن بالالارعا ارنالعان ورىندار جاسالىپ جاتىر. ماماندار اتالعان اۋماقتاردى قازان ايى اياقتالعانشا قولدانىسقا بەرەمىز دەيدى.