ناۋرىزباي اۋدانى ينجەنەرلىك ينفراقۇرىلىمدى جاڭعىرتىپ جاتىر. اقجار ىقشام اۋدانىندا سۋ قۇبىرى مەن كارىز جۇيەسىنىڭ تاراتاتىن جەلىلەردى سالۋدىڭ ەكىنشى كەزەڭى باستالدى. وڭىرلىك كوممۋنيكاسيالار قىزمەتى مەن اۋدان اكىمدىگى بىرلەسىپ ۇيىمداستىرعان پرەسس-تۋر بارىسىندا جۋرناليستەر وسى جۇمىستىڭ بارىسىمەن تانىستى.
بىلتىرعى شىلدە ايىندا باستالعان جوبادا 43،7 شاقىرىم سۋ قۇبىرى مەن 38،7 شاقىرىم كارىز جەلىسى تارتىلماق. جالپى قۇنى 3،9 ميلليارد تەڭگەنى قۇرايتىن قۇرىلىس جۇمىستارىن وسى كۇزگە دەيىن اياقتاۋ جوسپارلانعان.
«ءقازىر ىقشام اۋداننىڭ 52 كوشەسىندە قۇرىلىس اياقتالىپ، 37 شاقىرىم سۋ قۇبىرى مەن 35 شاقىرىم كارىز قۇبىرى تارتىلدى. كۇن سايىن بۇل نىسانعا 7-8 قۇرىلىس بريگاداسى مەن 20-دان استام ارنايى تەحنيكا جۇمىلدىرىلادى»، - دەيدى ناۋرىزباي اۋدانى اكىمىنىڭ ورىنباسارى جاندوس تاكىبايەۆ.
بۇل اۋدانداعى جۇزەگە اسىرىپ جاتقان التى اۋقىمدى ينفراقۇرىلىمدىق جوبانىڭ ءبىرى عانا. ءبىرىنشى كەزەڭ اياسىندا اقجار ىقشام اۋدانىندا 3 شاقىرىمنان استام ينجەنەرلىك جەلىلەر سالىنعان، ال قۇرىلىس جۇمىسى 2025 جىلدىڭ شىلدە ايىندا اياقتالماق. ءۇشىنشى كەزەڭدە 12،7 شاقىرىم كارىز بەن 16،2 شاقىرىم سۋ قۇبىرى جەلىسى تاعى سالىنادى.
قاراعايلى ىقشام اۋدانىندا ءبىرىنشى كەزەڭنىڭ جۇمىستارى اياقتالىپ، 4،2 شاقىرىم سۋ قۇبىرى مەن 2،1 شاقىرىم كارىز قۇبىرى تارتىلعان. سونىمەن قاتار، ۇزىندىعى 35 شاقىرىم بولاتىن باتىس كارىز كوللەكتورى سالىنىپ جاتىر، بۇل ناۋرىزباي جانە الاتاۋ اۋداندارىنىڭ 175 مىڭ تۇرعىنىن ورتالىقتاندىرىلعان كارىز جۇيەسىنە قوسپاق. قاراعايلىنىڭ وڭتۇستىك-شىعىس بولىگىندە دە ماگيسترالدى كارىز جەلىسىن تارتىپ جاتىر.
«وسى جوبالار جاڭا جانە بەلسەندى دامىپ كەلە جاتقان الماتىداعى ىقشام اۋدانداردىڭ ون مىڭداعان تۇرعىنىن سۋ قۇبىرى مەن كارىز قىزمەتىمەن قامتاماسىز ەتۋگە باعىتتالعان»، - دەپ اتاپ ءوتتى جاندوس تاكىبايەۆ.
بۇلار ناۋرىزباي اۋدانىندا تۇراقتى ينفراقۇرىلىمدىق بازانىڭ قالىپتاسۋىنا مۇمكىندىك بەرىپ، تۇرعىنداردىڭ ءومىر ساپاسىن ارتتىرماق.