الماتى اكىمى ەربولات دوسايەۆ جۇمىس ساپارى بارىسىندا ناۋرىزباي اۋدانىنداعى شۇعىلا شاعىن اۋدانىندا جاڭادان سالىنعان بالاباقشانى قاراپ شىقتى.
320 ورىندىق مەكتەپكە دەيىنگى ۇيىمنىڭ قۇرىلىسى 2022 جىلدىڭ مامىردا باستالعان بولاتىن. جوبا ەكى بولىككە ءبولىندى – عيماراتتى تۇرعىزۋ جانە اۋماقتى كورىكتەندىرۋ مەن ينجەنەرلىك جەلىلەردى سالۋ. الايدا مەردىگەر ۇيىمداردىڭ شارتتىق مىندەتتەمەلەرىن ورىنداماۋىنا بايلانىستى جوبانىڭ ىسكە اسۋ مەرزىمى كەشىكتى.
وسىعان بايلانىستى قۇرىلىس باسقارماسى «استانا-سترويينۆەست» كورپوراسياسى ج ش س جانە «تەپلوەنەرگوستروي» جشس-عا قاتىستى مەملەكەتتىك ساتىپ الۋلارعا مىندەتىنە سالعىرت قارايتىن جاۋاپسىز قاتىسۋشى دەپ تانۋ جانە ايىپپۇل ءوندىرۋ تۋرالى سوت تالاپتارىن بەردى. ءبىرىنشى مەردىگەرگە قاتىستى تالاپ-ارىز تولىق قاناعاتتاندىرىلدى، ال ەكىنشى تالاپ قارالۋدا.
قازىرگى ۋاقىتتا بالاباقشانىڭ قۇرىلىسى مەن ىشكى ارلەۋ جۇمىستارى تولىعىمەن اياقتالدى، اۋماق اباتتاندىرىلىپ، قاجەتتى جابدىقتار ورناتىلدى. سونداي-اق، بارلىق ينجەنەرلىك جەلى تارتىلىپ، قوسىلعان. ياعني، نىسان تولىق اياقتالىپ، پايدالانۋعا بەرۋ راسىمدەرى جۇرگىزىلۋدە.
عيماراتتا بالالارعا ارنالعان ارنايى وقۋ ورىندارى، سونىڭ ىشىندە گيمناستيكا جانە مۋزىكا ساباقتارىنا ارنالعان زالدار، سونداي-اق قىزمەتكەرلەرگە ارنالعان بولمەلەر قاراستىرىلعان. جوسپارلاۋ شەشىمدەرى ءارتۇرلى توپتاردىڭ بىر-بىرىنەن جانە اكىمشىلىك-شارۋاشىلىق بولمەلەردەن بارىنشا وقشاۋلانۋ قاعيداسىن قامتاماسىز ەتەدى.
نىساندى تەكسەرۋ قورىتىندىسى بويىنشا قالا باسشىسى قۇرىلىس جانە ءبىلىم بەرۋ باسقارمالارىنىڭ باسشىلىعىنا ءبىرقاتار كەمشىلىكتى كورسەتىپ، ولاردى قىسقا مەرزىمدە جويۋدى جۇكتەدى.
«اۋدان بەلسەندى دامۋدا جانە جاقىن ماڭداعى ۇيلەردىڭ تۇرعىندارى ءۇشىن الەۋمەتتىك ينفراقۇرىلىمنىڭ قولجەتىمدىلىگىن قامتاماسىز ەتۋ ماقساتىندا وسى شاعىن اۋداندا تاعى ءبىر بالاباقشا سالۋ تۋرالى شەشىم قابىلداندى. حالىق ونىڭ اشىلۋىن كۇتىپ وتىر، سوندىقتان بارلىق ەسكەرتۋدى جەدەل تۇردە جويىپ، جىل سوڭىنا دەيىن بالاباقشا بالالاردى قابىلداي باستاۋ كەرەك»، – دەدى ەربولات دوسايەۆ.
ايتا كەتۋ كەرەك، ناۋرىزباي اۋدانىندا 148 بالاباقشا جۇمىس ىستەيدى. كەلەسى جىلى ورىن تاپشىلىعىن ازايتۋ ماقساتىندا تاعى ەكى 320 ورىندىق بالاباقشانىڭ قۇرىلىسىن اياقتاۋ جوسپارلانىپ وتىر.