الماتىنىڭ ناۋرىزباي اۋدانىنىڭ اكىمى سانجار توعاي وڭىرلىك كوممۋنيكاسيالار قىزمەتىنىڭ بريفينگى بارىسىندا اۋداننىڭ ەڭبەك نارىعىنداعى جاعداي تۋرالى ايتتى. ونىڭ ايتۋىنشا، بيىل اۋداندا 2157 جۇمىس ورنى اشىلعان، 600-گە جۋىق جۇمىسسىز قوعامدىق جۇمىستارعا جىبەرىلگەن، دەپ حابارلايدى almaty-akshamy.kz
«جالپى، بيىل ءبىز 7 مىڭعا جۋىق جۇمىس ورنىن ۇسىنا وتىرىپ، اۋدان اۋماعىندا 120-عا جۋىق جاڭا جوبانى جۇزەگە اسىرۋدى جوسپارلاپ وتىرمىز»، - دەدى سانجار توعاي.
اۋدان تۇرعىندارىن جۇمىسپەن قامتۋ ءۇشىن «ەڭبەك»، «جۇمىسپەن قامتۋدىڭ جول كارتاسى»، «باستاۋ بيزنەس» جانە باسقا دا كوپتەگەن مەملەكەتتىك باعدارلامالاردىڭ مۇمكىندىكتەرى پايدالانىلادى.
ناۋرىزباي اۋدانىنىڭ اكىمى تۇرعىندارعا جاڭا جۇمىس ورىندارىن اشاتىن جاڭا دەنساۋلىق ساقتاۋ نىساندارىنىڭ قۇرىلىسى تۋرالى دا ايتتى.
سانجار توعايدىڭ ايتۋىنشا، جاڭادان سالىنعان ءتورت ەمحانامەن قاتار، قۇرامىس شاعىناۋدانىندا 500 ورىندى ەمحانا، اقجار شاعىناۋدانىندا 200 ورىندى وتباسىلىق-دارىگەرلىك امبۋلاتوريا جانە جىلجىمالى دارىگەرلىك امبۋلاتوريا اشۋ جوسپارلانۋدا.
تاۋسامالى شاعىناۋدانىنداعى مۇمكىندىگى شەكتەۋلى بالالارعا ارنالعان مۋزىكالىق مەكتەپ جانە ەكى دەنە شىنىقتىرۋ-ساۋىقتىرۋ ورتالىعى مەن يننوۆاسيالىق ونەر ورتالىعىنىڭ قۇرىلىسى كەزىندە دە جۇمىس ورىندارى پايدا بولادى.