جانۋارلاردى قورعاۋعا قاتىستى ماسەلە نازاردا بولۋعا ءتيىس
كۇنى كەشە «التىن وردا» بازارىنان 31 مىسىقتىڭ ءولىمشى كۇيدە تابىلعانى جۇرتتى ءبىراز الاڭداتتى. مۇنداي قاتىگەزدىككە جول بەرگەندەرگە قاتاڭ شارا قولدانىلماي تۇر.
ءقازىر جانۋارلارعا جاسالعان قاتىگەزدىكتى كورسەتەتىن ۆيدەولار كوبەيىپ كەتتى. مۇنداي وقيعالار جانۋارلاردى قورعاۋ زاڭ جۇزىندە اقساپ تۇرعانىن كورسەتەدى. دەگەنمەن، الماتىدا جانۋارلارعا مەيىرىممەن قاراپ، ولاردىڭ جاعدايى ءۇشىن الاڭدايتىن ەرىكتىلەر قاتارى كوبەيىپ جاتىر. ولاردىڭ ايتۋىنشا، بىزدە شەكتەۋ كوپ. «جانۋارلارمەن سەرۋەندەۋگە ىڭعايلى ارنايى پارك، سكۆەرلەر جوق. الماتىدا ءۇي جانۋارلارىمەن كىرۋگە بولاتىن ساناۋلى عانا مەيرامحانا بار»، – دەيدى اۋەزوۆ اۋدانىنىڭ تۇرعىنى ەلەنا. الايدا، ونىڭ دا وزىندىك تالاپتارى مەن ەرەجەلەرى بار. مىسالى، تاماقتانۋ ورىندارىنىڭ ءبىرى 60 سم-دەن اسپايتىن شاعىن كولەمدەگى يت-مىسىقتارعا عانا رۇقسات ەتسە، كەيبىرى تۇقىمىنا قاراي كىرگىزەدى. تۇرعىنداردىڭ ايتۋىنشا، يت-مىسىققا ارنالعان ارنايى ويىن الاڭى بار دەمالىس ورنى جوقتىڭ قاسى.
قۋانتار ءاليحانوۆ،
ۆەتەرينار:
– ۆەتەريناريا مەن مال شارۋاشىلىعى ماسەلەلەرىن مەملەكەتتىڭ ارالاسۋىنسىز رەتتەۋ، جانۋاردى اياۋسىز قورلاۋدى توقتاتۋ مۇمكىن ەمەس. ماحاتما گانديدىڭ: «ءاربىر ۇلتتىڭ مورالدىك دامۋ ۇدەرىسىن جانۋارلارعا قالاي قارايتىندىعى ارقىلى بىلۋگە بولادى»، – دەگەن ءسوزى بار. راسىمەن، ويلانۋعا تۇرارلىق ماسەلە. ق ر ازاماتتىق كودەكسىنە ۇڭىلەتىن بولساق، جانۋارلار «مەنشىك زاتىنا» تەڭەلگەن. ال، جابايى اڭدار «تابيعي رەسۋرستار» رەتىندە قورشاعان ورتانى قورعاۋ نەگىزىندە مەملەكەتتىڭ مەنشىگىندە بولىپ ەسەپتەلەدى. ەندەشە، ولاردى قورعاۋدىڭ زاڭ شەڭبەرىندەگى ءتارتىبى بار. الماتىدا 2018 جىلدىڭ باسىندا قابىلدانعان ءۇي جانۋارلارىن سەرۋەندەتۋ ەرەجەسى بار. ول جانۋاردى كۇتىپ-باعۋعا جاۋاپكەرشىلىكتى ارتتىرۋدى كوزدەيدى. دەگەنمەن، ەرەجەنىڭ قايتا قاراۋدى قاجەت ەتەتىن تۇستارى بار. ءقازىر بىزگە جانۋارلاردى قورعاۋعا قاتىستى ماسەلەنى باستى نازارعا الۋ قاجەتتىگى تۋىپ تۇر.
جادىڭىزدا ءجۇرسىن!
ق ر قىلمىستىق كودەكسىندە كورسەتىلگەندەي، «جانۋارلارعا قاتىگەزدىك جاساۋ» بابى بويىنشا، جانۋارلاردىڭ ولۋىنە نەمەسە مەرتىگۋىنە اكەلىپ سوققان قاتىگەزدىك، بۇزاقىلىق جاس بالالاردىڭ كوز الدىندا جاسالسا – 120 ايلىق كورسەتكىشپەن ايىپپۇل تولەۋ نەمەسە 30 تاۋلىككە قاماۋعا الۋ جازاسى قولدانىلادى. ال ەگەر توپتىق، ارنايى، الدىن الا كەلىسىلگەن تۇردە نەمەسە بىرنەشە مارتە قايتالانىپ جاسالعان جاعدايدا – 200 ايلىق ەسەپتىك كورسەتكىشكە دەيىن ايىپپۇل سالىنادى نەمەسە 50 تاۋلىككە دەيىن قاماۋعا الىنادى.