الماتىنىڭ ماڭىندا جىلىجاي كەشەنى اشىلدى
ەلىمىزدەگى ەڭ ءىرى مەگاپوليستىڭ تۇرعىندارىن ازىق-تۇلىكپەن قامتاماسىز ەتۋ ءۇشىن قاراساي اۋدانىنا قاراستى ەلتاي اۋىلدىق وكرۋگىنىڭ قاراتوبە ەلدى مەكەنىندە اۋىلشارۋاشىلىعى ونىمدەرىن وندىرەتىن «Eurasian Green Product» ءجشس-نىڭ قۇرىلتايشىلىعىمەن جىلىجاي كەشەنى اشىلدى، دەپ حابارلادى Almaty-akshamy.kz. الماتى وبلىسى اكىمىنىڭ باسپا ءسوز قىزمەتى تاراتقان حابارعا سىلتەمە جاساپ.
كەشەننىڭ اشىلۋ سالتاناتىندا ءسوز سويلەگەن قاراساي اۋدانىنىڭ اكىمى جانداربەك دالابايەۆ شاراعا جينالعان قاۋىمدى نەگىزىنەن ەكسپورتتىق باعىتتا جۇمىس جاسايتىن اۋقىمدى جىلىجايدىڭ ىسكە قوسىلۋىمەن قۇتتىقتاپ، ءوڭىر باسشىسى اماندىق باتالوۆتىڭ سالەمى مەن ىستىق ىقىلاسىن جەتكىزدى. جىلىنا 3.5 مىڭ توننا قىزاناق وندىرەتىن كەشەنگە «بيزنەستى قولداۋ» جول كارتاسى باعدارلاماسى اياسىندا وبلىس تاراپىنان قولداۋ كورسەتىلىپ، كەشەننىڭ ينفراقۇرىلىمىن قالىپتاستىرۋعا 330 ملن. تەڭگە جۇمسالعان ەكەن. جاڭادان 100 جۇمىس ورنى اشىلىپ،اۋدان بيۋدجەتىنە جىلىنا 100 ملن. تەڭگە تولەم تۇسەدى دەپ كوزدەلۋدە.
وسىدان كەيىن ءسوز العان «اگرارلىق نەسيە كورپوراسياسى» اۋسيونەرلىك قوعامىنىڭ باسقارما ءتوراعاسى ايبولات ابەنوۆ وسىدان ءۇش جىل بۇرىن اتالعان جوبانى قارجىلاندىرۋدى قولعا الىپ، مەملەكەتتىڭ قولداۋىمەن بولىنگەن 3،7 ملرد. تەڭگەنىڭ ناتيجەسىندە ەلىمىزدە بالاماسى جوق جاڭا جىلىجاي كەشەنى پايدا بولعانىن قۋانا جەتكىزدى. الداعى ۋاقىتتا وسى كەشەننىڭ جانىنان تاعى 5 گەكتار القاپقا قيار وسىرەتىن جىلىجاي تۇرعىزۋ جوسپارى بار ەكەن. ايبولات جاقسىلىق ۇلى «اگرارلىق نەسيە كورپوراسياسى» بۇل جوباعا دا قولداۋ كورسەتەتىنىن ايتىپ، كەشەن قىزمەتكەرلەرىنىڭ جۇمىسىنا ساتتىلىك تىلەدى.
ءوز كەزەگىندە «Eurasian Green Product» ج ش س قۇرىلتايشىلارىنىڭ ءبىرى جاندوس تۇرسسىنعالييەۆ وندىرىستىك سالتاناتتى شارانىڭ قوناقتارىنا جىلىجاي كەشەنىنىڭ جۇمىسى مەن بولاشاقتاعى جوسپارلارى تۋرالى اڭگىمەلەپ بەردى. اتالعان كومپانيا بۇعان دەيىن دە اۋىلشارۋاشىلىعى سالاسىندا ءبىرشاما شارۋالار اتقارعان بولاتىن. ال، بۇل جولى جىلىنا 3 407 توننا قىزاناق وسىرەتىن، گوللانديانىڭ ەڭ سوڭعى تەحنولوگياسى بويىنشا سالىنعان الىپ كەشەن وندىرىسكە ەنگىزىلىپ وتىر. اتالعان جوباعا 5،5 ملرد. تەڭگە ينۆەستيسيا تارتىلىپ، 100-دەن اسا جەرگىلىكتى تۇرعىن تۇراقتى جۇمىسپەن قامتاماسىز ەتىلەتىن بولادى. وسى ارقىلى الماتى وبلىسى مەن قالاسىن اسا ساپالى قىزاناقپەن قامتاماسىز ەتىپ، رەسەيگە ەكسپورتقا شىعارۋ جۇزەگە اسىرىلۋدا. ءۇشىنشى كەزەڭگە ارنالعان جوسپار بويىنشا وسى جەردەن كوكونىس پەن جەمىس ساقتاۋ قويماسى سالىنادى دەپ كۇتىلۋدە.
وندىرىستىك جىلىجاي كەشەنىنىڭ لەنتاسىن قيعاننان كەيىن قوناقتار جىلىجايدىڭ ءىشىن ارالاپ، وندىرىستىك قۇرىلىمدارمەن تانىستى. سوڭىنان كەشەننىڭ الدىنا كوك جەلەكتەردى وتىرعىزۋ داستۇرىنە كەزەك بەرىلدى.
