الماتىنىڭ جەتىسۋ اۋدانىندا «№1 قالالىق ەمحانانىڭ» جاڭا فيليالى اشىلدى ءوتتى، دەپ حابارلايدى قالالىق قوعامدىق دەنساۋلىق ساقتاۋ باسقارماسى. مەديسينالىق نىساندى پايدالانۋعا بەرۋ مەديسينالىق-سانيتارلىق العاشقى كومەكتىڭ قولجەتىمدىلىگىن ارتتىرۋعا جانە اۋدان تۇرعىندارىنا كورسەتىلەتىن قىزمەت ساپاسىن جاقسارتۋعا باعىتتالعان.
فيليالدا مەديسينالىق-سانيتارلىق العاشقى كومەكتىڭ تاجىريبەلى دارىگەرلەر مەن تار بەيىندى مامانداردىڭ قابىلداۋى، پروفيلاكتيكالىق تەكسەرۋلەر مەن ۆاكسيناسيا، جۇكتى ايەلدەر مەن بالالاردى باقىلاۋ، سوزىلمالى اۋرۋلارى بار ناۋقاستاردى قاداعالاۋ جانە ۇيگە بارىپ كومەك كورسەتۋ سىندى قىزمەتتىڭ تولىق سپەكترىن كورسەتەدى.
مەديسينالىق مەكەمە قولدانىستاعى ستاندارتتارعا سايكەس زاماناۋي جابدىقتارمەن تولىق قامتاماسىز ەتىلگەن. عيماراتتا، سونىڭ ىشىندە، مۇمكىندىگى شەكتەۋلى ازاماتتار ءۇشىن دە ىڭعايلى ءارى قولجەتىمدى جاعداي جاسالعان. فيليالدا ءدارىحانا، سيفرلىق رەنتگەن، زاماناۋي ۋدز جابدىقتارى، لور جانە وفتالمولوگ كابينەتتەرى، وقشاۋلاعىشتارى بار بولەك سۇزگى-بولمەلەر، قىسقا تولقىندى، لازەرلىك، ۋلترادىبىستىق، ەلەكتر جانە ماگنيتتىك تەراپياعا ارنالعان جابدىقتارمەن قامتىلعان فيزيوتەراپيا كابينەتى، روبوتتاندىرىلعان جابدىقتارى بار وڭالتۋ كابينەتى، سونداي-اق بەينەەندوسكوپيالىق جۇيەمەن جابدىقتالعان فيبروگاسترودۋودەنوسكوپيا كابينەتى جۇمىس ىستەيدى. اكۋشەر-گينەكولوگ كابينەتى شاعىن حيرۋرگيالىق ارالاسۋلار مەن كارديوتوكوگرافيا جۇرگىزۋگە ارنالعان قۇرالدارمەن جابدىقتالعان.
فيليالدىڭ اشىلۋى قولدانىستاعى دەنساۋلىق ساقتاۋ ۇيىمدارىنا تۇسەتىن جۇكتەمەنى ازايتىپ، قابىلداۋدى كۇتۋ ۋاقىتىن قىسقارتۋعا جانە اۋدان تۇرعىندارى ءۇشىن مەديسينالىق كومەكتى تۇرعىلىقتى جەرىنە جاقىن جەردە قولجەتىمدى ەتۋگە مۇمكىندىك بەرەدى.
ايتا كەتەيىك، بۇگىندە جەتىسۋ اۋدانىندا شامامەن 200 مىڭعا جۋىق تۇرعىن بار. ولاردىڭ 135 مىڭى مەملەكەتتىك ەمحانالارعا تىركەلگەن بولسا، قالعان تۇرعىندار قالانىڭ وزگە اۋداندارىنداعى مەديسينالىق ۇيىمداردىڭ قىزمەتىن پايدالانىپ كەلەدى. جاڭا فيليالدى پايدالانۋعا بەرۋ پاسيەنتتەر سانىن ءتيىمدى قايتا بولۋگە جانە جەتىسۋ اۋدانى تۇرعىندارى ەسەبىنەن تىركەلگەن حالىق سانىن كەزەڭ-كەزەڭىمەن 15،5 مىڭنان 30 مىڭ ادامعا دەيىن ۇلعايتۋعا جاعداي جاسايدى، دەدى قوعامدىق دەنساۋلىق ساقتاۋ باسقارماسىنىڭ وكىلدەرى.