ونىمدەردى 300-دەن استام اۋىل شارۋاشىلىعى تاۋار وندىرۋشىلەرى ۇسىنادى
الماتىدا قولجەتىمدى باعادا جاڭا ءارى بالعىن ونىمدەر الۋعا بولاتىن تاعى ءبىر ورىن اشىلادى، دەپ حابارلايدى aqshamnews.kz.
جەتىسۋ اۋدانىندا «دەمالىس كۇنگى جارمەڭكە» جۇمىسىن باستايتىنىن «الماتى» الەۋمەتتىك-كاسىپكەرلىك كورپوراسياسى حابارلادى.
جارمەڭكەنىڭ ماقساتى – جەرگىلىكتى شارۋالارعا ءوز ونىمدەرىن وتكىزۋگە مۇمكىندىك جاساۋ، ال تۇرعىندارعا الەۋمەتتىك ماڭىزى بار ازىق-تۇلىكتى قولجەتىمدى باعامەن ۇسىنۋ.
الداعى دەمالىس كۇندەرى قۇلاگەر ىقشاماۋدانىنداعى «گۇلدەر» ساياباعىنىڭ الدىندا 15 ساۋدا جاسايتىن شاتىرلار قويىلادى. مۇندا جىلقى، سيىر، قوي جانە قۇس ەتى، ءسۇت ونىمدەرى، جۇمىرتقا، كوكونىس پەن جەمىس-جيدەك، سونداي-اق جاڭا پىسكەن نان-توقاش ونىمدەرى ساتىلادى. ساۋدا الاڭى دەمالىس كۇندەرى ساعات 09:00-دەن 18:00-گە دەيىن جۇمىس ىستەيدى.
ءقازىر دەمالىس كۇنگى جارمەڭكەلەر الماتىنىڭ بىرنەشە اۋدانىندا تۇراقتى تۇردە وتەدى:
- المالى اۋدانى – ماسانچي كوشەسى (ايتەكە بي – گوگول كوشەلەرىنىڭ اراسى)؛
- اۋەزوۆ اۋدانى – وتەگەن باتىر كوشەسى (اباي داڭعىلىنان تومەن)؛
- بوستاندىق اۋدانى – قازاقفيلم ىقشاماۋدانى (ءال-فارابي داڭعىلىنان جوعارى)؛
- مەدەۋ اۋدانى – مەڭدىقۇلوۆ بۋلۆارى – بەكتۇروۆ كوشەسى.
اپتا سايىن جارمەڭكەلەرگە 45 مىڭنان استام قالا تۇرعىنى كەلەدى. ونىمدەردى الماتى مەن الماتى وبلىسىنىڭ 300-دەن استام اۋىل شارۋاشىلىعى تاۋار وندىرۋشىلەرى ۇسىنادى. ساۋدا سورەلەرىندە 1000-نان استام تاۋار ءتۇرى بار: ەت، جۇمىرتقا، كوكونىس، جەمىس-جيدەك، ءسۇت ونىمدەرى، شۇجىق، بال جانە تاعى باسقاسى.
باعانى تۇراقتاندىرۋ شارالارى اياسىندا الەۋمەتتىك ماڭىزى بار ازىق-تۇلىكتەر نارىقتاعىدان 15–20 پايىز تومەن باعامەن ساتىلادى.