1 قىركۇيەكتەن باستاپ ەلىمىزدىڭ بارلىق ءبىلىم بەرۋ ۇيىمدارىندا جەكە قاۋىپسىزدىك ساباقتارى قايتا باستالادى.
بۇل ساباقتار بالالاردىڭ ءتۇرلى ومىرلىك جاعدايلاردا دۇرىس ارەكەت ەتۋگە قاجەتتى پراكتيكالىق داعدىلارىن قالىپتاستىرۋعا جانە جەكە قاۋىپسىزدىككە جاۋاپكەرشىلىكپەن قاراۋىن دامىتۋعا باعىتتالعان، دەپ حابارلايدى aqshamnews.kz.
ساباقتار بالاباقشالاردان باستاپ كوللەدجدەرگە دەيىن ءبىلىم بەرۋدىڭ بارلىق دەڭگەيىن قامتيدى. ءار جاس ەرەكشەلىگىنە سايكەس بولەك بلوك ازىرلەنگەن:
•بالاباقشا — جەدەل قىزمەت نومىرلەرىن ءبىلۋ، ويىن جانە دەمالىس الاڭدارىنداعى قاۋىپسىزدىك ەرەجەلەرى؛
•باستاۋىش سىنىپتار — سۋداعى جانە مۇزداعى قاۋىپسىزدىك، بەيتانىس ادامدارمەن كەزدەسكەندە ءوزىن ۇستاۋ، قاڭعىباس يتتەردەن قورعانۋ؛
•ورتا بۋىن سىنىپتارى — بۋللينگ پەن كيبەربۋللينگ، ءقاۋىپتى ينتەرنەت-اۋەستەنۋلەر، بەيتانىستاردىڭ ۇسىنىستارىنان باس تارتۋ، ءوز ىس-ارەكەتىنە جاۋاپكەرشىلىكتى قالىپتاستىرۋ؛
•جوعارى سىنىپتار مەن كوللەدجدەر — قارجىلىق ساۋاتتىلىق، الاياقتاردان قورعانۋ، ونلاين-ويىندارداعى تاۋەكەلدەر، ەڭبەك قاۋىپسىزدىگى، ءوز قۇقىقتارى مەن مىندەتتەرىن ءبىلۋ، جەكە ارەكەتتەرى ءۇشىن جاۋاپكەرشىلىك.
ساباقتار ءار اپتادا سىنىپ ساعاتى اياسىندا 10 مينۋتتان وتكىزىلەدى جانە تاقىرىپتار جىلىنا ءۇش رەت قايتالانادى.
باعدارلامانى ىسكە اسىرۋ بارىسىندا ءۇش كەزەڭدى مونيتورينگ جۇرگىزىلدى. ونىڭ ىشىندە پەداگوگتەر مەن پسيحولوگتارعا ارنالعان كەڭەستەر مەن ۆەبينارلار ۇيىمداستىرىلدى، سونداي-اق پوليسيا، تجم جانە دەنساۋلىق ساقتاۋ وكىلدەرى تارتىلدى. انكەتا الۋ، جوبالار، بەينەروليكتەر جانە وزگە دە ينتەراكتيۆتى ادىستەر قولدانىلدى.
«تاجىريبە كورسەتكەندەي، مۇنداي ساباقتار بالالاردىڭ مازاسىزدىعىن تومەندەتىپ، ءقاۋىپسىز مىنەز-قۇلىق داعدىلارىن قالىپتاستىرادى جانە ولاردى ومىردەگى، ونلاين ورتاداعى كۇردەلى جاعدايلاردا دۇرىس ارەكەت ەتۋگە ۇيرەتەدى»، – دەپ اتاپ ءوتتى ق ر وقۋ-اعارتۋ مينيسترلىگى بالالاردىڭ قۇقىقتارىن قورعاۋ كوميتەتىنىڭ ءتورايىمى ناسىمجان وسپانوۆا.
ەسكە سالا كەتەيىك، جەكە قاۋىپسىزدىك ساباقتارى 2023–2025 جىلدارعا ارنالعان بالالاردى زورلىق-زومبىلىقتان قورعاۋ، ءسۋيسيدتىڭ الدىن الۋ جانە ولاردىڭ قۇقىقتارى مەن سالاماتتىلىعىن قامتاماسىز ەتۋ جونىندەگى كەشەندى جوسپار اياسىندا ەنگىزىلگەن.