الماتىنىڭ حايۋاناتتار باعىندا سۋسيىر تولدەدى

حايۋاناتتار باعىنداعى جانۋارلار سانى بىرەۋگە كوبەيدى.

زووباقتىڭ مالىمەتىنشە، كىشكەنتاي سۋسيىردىڭ اكەسىنىڭ ەسىمى – دجامبو. ول 2007 جىلى ومىرگە كەلگەن. 2009 جىلى يزرايلدەن الماتى حايۋاناتتار باعىنا اكەلىنگەن. ونىڭ سىڭارى لوتتي 2010 جىلى ومىرگە كەلگەن. 2018 جىلى فرانسيادان الماتى زووباعىنا اكەلىنگەن، دەپ حابارلايدى Almaty-akshamy.kz.

«ولار بىردەن جۇپ بولمادى. العاشقى كەزدە دجامبو ءلوتتيدى ءسۇزىپ، قارسىلىق كورسەتەتىن. ۋاقىت وتە كەلە ەكەۋى ءتىل تابىسىپ كەتتى. لوتتي 22 مامىر كۇنى تولدەدى. كىشكەنتاي ۇرعاشى سۋسيىردىڭ سالماعى 38 كەلى، بويى 50 سم. ءقازىر ولاردىڭ جاعدايى جاقسى. ەكەۋى دالاداعى قورشاۋعا ورنالاستىرىلدى»، - دەپ حابارلادى زووباقتىڭ باسپا ءسوز قىزمەتى.

سونداي-اق زووباق ۇجىمى كىشكەنتاي سۋسيىرعا ات قويۋ ءۇشىن وقىرماندارعا Instagram پاراقشاسىندا ۇسىنىس پىكىرلەرىن قالدىرۋدى، ۇزدىك ەسىمدى زووباق ۇجىمى تاڭداپ الاتىنىن حابارلادى. ودان بولەك، زووباق ۇجىمى «افريكا ساۆانناسى» كەشەنى قۇرىلىسىنىڭ جوبالىق-سمەتالىق قۇجاتىن دايىنداۋدى باستاعانىن ءمالىم ەتتى.

«الداعى ۋاقىتتا بۇل جەردە سۋسيىرلار، پىلدەر، كەرىكتەر، زەبرالار مەن انتيلوپالار تۇراتىن بولادى. جوبا ۋاقىتىندا جاسالسا، كەلەسى جىلى قۇرىلىستى باستايمىز»، – دەپ حابارلادى زووباقتان.