ءماسىموۆ جازاسىن قاۋىپسىزدىگى ورتاشا مەكەمەدە وتەيدى

ۇلتتىق قاۋىپسىزدىك كوميتەتىنىڭ بۇرىنعى باسشىسى كارىم ءماسىموۆتىڭ جازاسىن وتەۋ مەكەمەسى جوعارى قاۋىپتىلىكتەن ورتاشاعا اۋىستىرىلدى.

2023 جىلعى 16 ماۋسىمدا استانا قالاسى سوتىنىڭ قىلمىستىق ىستەر جونىندەگى اپەللياسيالىق ساتىسى ك. ءماسىموۆ، ا. سادىقۇلوۆ، د. ەرعوجين، م. وسيپوۆ جانە ولاردىڭ قورعاۋشىلارىنىڭ شاعىمدارى بويىنشا «وتە قۇپيا» دەگەن بەلگىمەن قىلمىستىق ءىستى قايتا قارادى، دەپ حابارلايدى Almaty-akshamy.kz قازاقپاراتقا سىلتەمە جاساپ.

استانا قالاسىنىڭ قىلمىستىق ىستەر جونىندەگى مامانداندىرىلعان اۋدانارالىق سوتىنىڭ 2023 جىلعى 24 ساۋىردەگى ۇكىمىمەن ك. ءماسىموۆ پەن ا.سادىقۇلوۆ قىلمىستىق كودەكستىڭ 175-بابىنىڭ 1-بولىگى، 179-بابىنىڭ 3-بولىگى، 362-بابىنىڭ 4-بولىگى 3-تارماعى بويىنشا كىنالى دەپ تانىلىپ، 18 جانە 16 جىلعا باس بوستاندىعىنان ايىرىلدى.

ەرعوجين د. قىلمىستىق كودەكستىڭ 179-بابىنىڭ 3-بولىگى، 362-بابىنىڭ 4-بولىگى 3-تارماعى بويىنشا كىنالى دەپ تانىلىپ، 15 جىلعا باس بوستاندىعىنان ايىرىلدى.

وسيپوۆ م. قىلمىستىق كودەكستىڭ 362-بابىنىڭ 3-بولىگى بويىنشا 3 جىل مەرزىمگە باس بوستاندىعىنان ايىرىلدى.

اپەللياسيالىق ساتى ك.ماسىموۆكە، ا. سادىقۇلوۆقا جانە د. ەرعوجينگە قاتىستى سوتتىڭ ءبىرىنشى ساتىداعى «جازاسىن قاۋىپسىزدىگى ەڭ جوعارى مەكەمەدە وتەۋ» ۇكىمىن «ورتاشا قاۋىپسىزدىكتەگى مەكەمەدە جازاسىن وتەۋ» ۇكىمىنە وزگەرتتى.

قىلمىستىق كودەكستىڭ 6-بابىنا سايكەس، سوتتالعانداردىڭ جاعدايىن جاقسارتاتىن زاڭ كەرى كۇشكە يە جانە سوتتاردىڭ قولدانۋى ءۇشىن مىندەتتى.

2023 جىلعى 21 مامىردا كۇشىنە ەنگەن قىلمىستىق كودەكستىڭ 46-بابىنا زاڭ شىعارۋشى ەنگىزگەن وزگەرىستەرگە سايكەس بۇرىن باس بوستاندىعىنان ايىرۋدى وتەمەگەن، قاساقانا قىلمىس جاساعانى ءۇشىن 2 جىلدان استام مەرزىمگە باس بوستاندىعىنان ايىرىلعان ادامدارعا باس بوستاندىعىنان ايىرۋ تۇرىندەگى جازانى وتەۋ ورتاشا قاۋىپسىزدىك قىلمىستىق-اتقارۋ جۇيەسىنىڭ مەكەمەلەرىندە تاعايىندالادى (باس بوستاندىعىنان ايىرۋعا قاراماستان).

قالعان بولىگىندە ۇكىم وزگەرىسسىز قالادى. ۇكىم زاڭدى كۇشىنە ەندى.