2023 جىلى 1 شىلدەدەن باستاپ 4 كۇندىك جۇمىس اپتاسى تۋرالى ەڭبەك كودەكسىنە ءتيىستى وزگەرىستەر ەنگىزىلدى.
بۇل تۋرالى وكق بريفينگىندە الماتى قالاسى ەڭبەك ينسپەكسياسى باسقارماسىنىڭ باسشىسى، باس مەملەكەتتىك ەڭبەك ينسپەكتورى ەركىنبەك امىرعالييەۆ ايتىپ بەردى، دەپ حابارلايدى Almaty-akshamy.kz.
ءتورت كۇندىك جۇمىس اپتاسىن جۇمىس بەرۋشى مەن قىزمەتكەرلەردىڭ كەلىسىمى بويىنشا ەڭبەك شارتىندا بەلگىلەنەدى.
"اتاپ ايتساق، بارلىق جۇمىس بەرۋشىلەر مەن قىزمەتكەرلەر اۆتوماتتى تۇردە ءتورت كۇندىك جۇمىس اپتاسىنا اۋىسادى دەگەن ءسوز ەمەس، ويتكەنى اۋىسۋ ءۇشىن تاراپتار، ياعني جۇمىس بەرۋشى مەن قىزمەتكەر وسى كەلىسىمگە كەلىپ، ونى ەڭبەك شارتىندا راسىمدەۋى قاجەت"، - دەدى سپيكەر.
سپيكەردىڭ ايتۋىنشا، بۇل تۇزەتۋدىڭ وتباسى ينستيتۋتىن نىعايتۋعا جانە مەملەكەتتىك ورتاق جاۋاپكەرشىلىكتى، جۇمىس بەرۋشى مەن قىزمەتكەرلەردىڭ، قوعام مۇشەلەرىنىڭ جەكە دەنساۋلىعىن نىعايتۋعا باعىتتالعان كوپتەگەن ارتىقشىلىقتارى بار.
"ءتورت كۇندىك جۇمىس اپتاسى فرانسيا، يسلانديا، يسپانيا سياقتى ەلدەردىڭ زاڭناماسىندا قاراستىرىلعان. كەيبىر ەلدەردە مۇنداي تۇزەتۋلەردىڭ تيىمدىلىگى الەۋمەتتىك ەكسپەريمەنتتەر جۇرگىزۋ ارقىلى دالەلدەندى، بۇل ەڭبەك ونىمدىلىگىنىڭ ناشارلاماي، كەرىسىنشە جوعارىلاعانىن كورسەتتى. ساراپشىلاردىڭ پىكىرىنشە، مۇنداي وزگەرىستەر كۇيزەلىستىڭ الدىن الادى. وزگەرىستەردى ەنگىزگەن ەلدەردىڭ تاجىريبەسى كورسەتكەندەي، قىزمەتكەرلەر اۋرۋحاناعا سيرەك بارىپ جانە جالپى جۇمىستان سۇرانۋ ازايعان"، - دەدى ە.امىرعالييەۆ.
سونىمەن قاتار، كاسىپورىندار جۇمىس كولەمى ازايعان كەزەڭدە ءتورت كۇندىك جۇمىس اپتاسىن بەكىتىپ، ودان كەيىن وندىرىستىك قاجەتتىلىك تۋىنداعان جاعدايدا التى كۇندىك جۇمىس اپتاسىنا اۋىسا الادى. ءتورت كۇندىك جۇمىس اپتاسىن بەلگىلەۋ كەزىندە كاسىپورىندار ەلەكتر قۋاتى مەن كەڭسە شىعىندارىن دا ۇنەمدەي الادى.
"وسى كودەكستە جانە قازاقستان رەسپۋبليكاسىنىڭ وزگە دە زاڭنامالارىندا كوزدەلگەن جاعدايلاردى قوسپاعاندا، جۇمىس ۋاقىتىنىڭ قالىپتى ۇزاقتىعى اپتاسىنا 40 ساعاتتان اسپاۋعا جانە كۇندەلىكتى جۇمىستىڭ ۇزاقتىعى 8 ساعاتتان اسپاۋى ءتيىس. سونداي - اق، جۇمىس ۋاقىتىنىڭ جيىنتىق ەسەبىن بەلگىلەۋ كەزىندە - قوسىمشا جۇمىستاردىڭ جالپى ۇزاقتىعى ايىنا ون ەكى ساعاتتان جانە جىلىنا ءجۇز جيىرما ساعاتتان اسپاۋى قاجەت" - دەپ كەڭىنەن ءتۇسىندىردى سپيكەر.
بەس كۇندىك، التى كۇندىك نەمەسە ءتورت كۇندىك جۇمىس اپتاسىندا جالپى دەمالىس كۇنى جەكسەنبى بولىپ تابىلادى. بەس كۇندىك جانە ءتورت كۇندىك جۇمىس اپتاسىنداعى ەكىنشى نەمەسە ءۇشىنشى دەمالىس كۇنى ۇجىمدىق شارتتا نەمەسە ەڭبەك ءتارتىبىنىڭ ەرەجەلەرىندە عانا بەلگىلەنەدى.
سونىمەن بىرگە، جۇمىس بەرۋشىلەر ەڭبەك ينسپەكسياسىن وسىنداي فورماتقا كوشۋ تۋرالى حاباردار ەتۋگە مىندەتتى ەمەس جانە تيىسىنشە ينسپەكسيادا 4 كۇندىك جۇمىس اپتاسىنا اۋىسقان ۇيىمداردىڭ سانى تۋرالى اقپارات بەرىلمەيدى.