1700-دەن اسا پاتەرى بار Gulder تۇرعىن ءۇي كەشەنىنە كىرەتىن نەگىزگى قاقپا جابىلىپ قالۋى مۇمكىن.
ويتكەنى، كىرەبەرىس اۋماق جەكەمەنشىككە تيەسىلى ەكەن. قاقپانىڭ ءبىر قاپتالى قورشالىپ، قۇرىلىس جۇمىستارى باستالعانىن كورگەن تۇرعىندار دابىل قاقتى، دەپ حابارلايدى Almaty-akshamy.kz.
«تۇرعىن ءۇيدى سالعان قۇرىلىس كومپانياسى بولسا تۇرعىندارعا باسقا جەردەن جول اشىپ بەرەمىز، دەپتى. قوسالقا قاقپا كولىكتەرگە دە، جاياۋ جۇرگىنشىلەرگە دە قولايسىز»، - دەيدى جۇرت.
24.kzء-تىڭ اقپاراتىنا سۇيەنسەك، رايىمبەك داڭعىلىنىڭ بويىندا ورنالاسقان Gulder تۇرعىن ءۇي كەشەنى 2020 جىلدان باستاپ پايدالانۋعا بەرىلگەن. ءقازىر 7 مىڭعا جۋىق ادام تۇرادى. كۇرە جولدىڭ بويىندا ورنالاسقان نەگىزگى قاقپا جابىلادى، دەگەن اقپاراتتى ەستىگەن تۇرعىندار الاڭداۋلى. قۇرىلىس كومپانياسى ايتقان قوسالقى جول تۇرعىندارعا مۇلدەم قولايسىز ەكەن.
«مەن ءوزىم كوپبالالى انامىن، بالالارىممەن ءوتىپ شىعۋ ماعان ىڭعايلى. ەندى بىزگە ۇسىنىپ جاتقانى بۇلاردىڭ وتە تار كوشە مىنا جاقتا ءابىشوۆ دەگەن كوشە ونى بارىپ كورگەندەر بار شىعار. وتە تار، ءجۇرۋ مۇمكىن ەمەس. بىرىنشىدەن ءجۇرۋ مۇمكىن ەمەس، ەكىنشىدەن بالالارىممەن مەن اۆتوبۋسقا دەيىن ۇزاق اينالىپ جۇرك كەرەكپىن. ۋاقىت كەتەدى، ول ماعان وتە ىڭعايسىز جانە ءتيىمسىز»، - دەيدى تۇرعىنداردىڭ ءبىرى ايگەرىم يساعالييەۆا.
«قازىرگى قاقپانى جاۋىپ تاستاماقشى، سەبەبى ول جەردىڭ يەسى باسقا ادام ەكەن. ءۇي ساتقان كەزدە مۇنداي ماسەلە بار ەكەنىن ايتپادى. رايىمبەك داڭعىلىنا تىكە شىعاسىزدار دەپ ايتتى. ءبىز قازىرگى قاقپانى قادىرۋىن سۇرايمىز. قۇرىلىس كومپانياسى ءبىزدى الداپ كەتتى دەپ ويلايمىن»، - دەيدى ءۇي تۇرعىنى رابيعا سمايلوۆا.
قوسالقى قاقپا ارقىلى رايىمبەك داڭعىلىنا شىعۋ ءۇشىن ءبىر شاقىرىم جولدى اينالىپ ءجۇرۋ كەرەك ەكەن. ەكىنشىدەن ونداعى جەكە ءۇيدىڭ يەلەرى مىڭنان اسا ادام مەن كولىكتىڭ كىرىپ، شىعۋىنا قارسى. قالا ورتاسىندا قامالىپ قالمايىق دەگەن تۇرعىندار جاۋاپتىلارمەن كەزدەسىپ، تالاپتارىن جەتكىزدى. قاقپا جابىلاتىن بولسا، قۇرىلىس كومپانياسىن سوتقا بەرەمىز، دەيدى اشۋلى جۇرت.
«تۇرعىندارمەن كەزدەسۋگە دەيىن ءبىزدىڭ الماتى قالاسى بويىنشا باسشىسىمىز مىنا جەر تەلىمىنىڭ يەسىمەن كەزدەستى. جۇما كۇنگە دەيىن ماسەلەنى شەشۋگە كەلىستى. باسشىلىقتىڭ ايتۋىنشا، بۇل ماسەلە شەشىم تابادى. ياعني، بۇل قاقپا گۇلدەر تۇرعىن ءۇيىنىڭ يەلىگىندە قالادى»، - دەيدى قۇرىلىس كومپانياسىنىڭ سەرۆيستىك قىزمەت كورسەتۋ ديرەكتورى ەلدار كابدراحمانوۆ.
«ساتۋشى مەن ساتىپ الۋشى ورتاسىنداعى كەلىسىم. ەندى ساتۋشى ءوزىنىڭ مىندەتىن ورىنداۋ كەرەك قوي. ەگەر ساتۋشى ءوزىنىڭ مىندەتىن ورىنداماسا، بۇل جەردى ساتىپ المايمىن دەسە ونداي بولسا اكىمدىك مىندەتتى تۇردە بۇعان نازار اۋدارادى. كەزدەسۋگە كەلگەن قۇرىلىس كومپانياسىنىڭ وكىلى تۇرعىندار تالابىن اپتا سوڭىنا دەيىن ورىندايتىنىن ايتتى. ال ناۋرىزباي اۋدانى اكىمدىگى ۋادەنىڭ ورىندالۋىن باقىلايمىز دەيدى»، - دەيدى ناۋرىزباي اۋدانى اكىمدىگىنىڭ ءبولىم باسشىسى نۇربول بەيسەكوۆ.