ءتيىستى شەشىمدەر ەسكەرىلدى.
الماتىنىڭ ەكولوگيالىق جاعدايىن جاقسارتۋعا قاتىستى تىڭ قادامدار جاسالادى. بۇل تۋرالى سەناتتىڭ جالپى وتىرىسىندا ق ر يندۋستريا جانە ينفراقۇرىلىمدىق دامۋ ءمينيسترى قايىربەك وسكەنبايەۆ ءمالىم ەتتى، دەپ حابارلايدى Almaty-akshamy.kz قازاقپاراتقا سىلتەمە جاساپ.
اتاپ ايتقاندا، بۇگىن سەنات «كەيبىر زاڭنامالىق اكتىلەرىنە ەلەكتر ەنەرگەتيكاسى، ەنەرگيا ۇنەمدەۋ جانە ەنەرگيا تيىمدىلىگىن ارتتىرۋ، جەر قويناۋىن پايدالانۋ، جەرگىلىكتى مەملەكەتتىك باسقارۋ جانە مەملەكەتتىك شەكارا ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسىن ءبىرىنشى وقىلىمدا ماقۇلدادى.
قۇجات اياسىندا الماتىعا قاتىستى ءتيىستى شەشىمدەر ەسكەرىلگەن.
«الماتىنىڭ تاعى ءبىر وزەكتى ماسەلەسى – ول قالانىڭ ەكولوگيالىق جاي-كۇيى. بۇگىندە لاستانۋدىڭ نەگىزگى كوزدەرى رەتىندە كولىك سەكتورى جانە ەكىنشى جىلۋ ەنەرگيا ورتالىعى بولىپ وتىر. ولارعا گاز شىعارىندىلارىنىڭ 60% جانە 31% تيەسىلى. نورماتيۆتەن تىس شىعارىندىلارى بار (ەكولوگيالىق بەكەتتەردە) اۆتوكولىك قۇرالدارىنا قاتىستى ولشەمدى جۇزەگە اسىرۋ جانە انىقتاۋ ءتارتىبىن رەگلامەنتتەۋ ەسكەرىلگەن. وسى ورايدا كولىك قۇرالدارىنا ءتيىستى ولشەمدى جۇزەگە اسىرۋ جونىندەگى قاعيدالاردى بەكىتۋ كوزدەلگەن»، - دەدى قايىربەك وسكەنبايەۆ.
ونىڭ ايتۋىنشا، كومىر ستانسيالارىنان پارنيكتىك گاز شىعارىندىلارىن تومەندەتۋ بويىنشا رەسپۋبليكالىق ماڭىزى بار قالالار مەن استانا ءۇشىن وتىننىڭ بالاما ءتۇرى رەتىندە گازدى پايدالانا وتىرىپ، گەنەراسيالايتىن قوندىرعىلاردى سالۋ ارقىلى جاڭعىرتۋ، رەكونسترۋكسيالاۋ جانە كەڭەيتۋ جونىندەگى جوبالارعا ينۆەستيسيالاردى قايتارۋ تەتىگىن زاڭنامالىق تۇردە ەنگىزۋ ۇسىنىلادى.