الماتىنىڭ دوستىق شاعىن اۋدانىنداعى 759 ءۇي ورتالىقتاندىرىلعان كارىز جۇيەسىنە قوسىلادى.
ەربولات دوسايەۆ اۋەزوۆ اۋدانىن ارالاۋ بارىسىندا دوستىق شاعىن اۋدانىنداعى سۋ بۇرۋ جەلىلەرىنىڭ قۇرىلىسىمەن تانىستى. بۇل جۇمىس اياقتالعان سوڭ 759 ءۇي ورتالىق كارىزگە قوسىلادى، دەپ حابارلايدى Almaty-akshamy.kz.
جۇمىستى «سپەسكوممۋنستروي» ج ش س مەردىگەرلىك ۇيىمى 22 كوشەدە جۇرگىزىپ جاتىر، سۋ بۇرۋ جەلىلەرىنىڭ جالپى ۇزىندىعى 13،7 كم. اۋدان اكىمى ابزال ەگەمبەردييەۆ قالا باسشىسىنا مەردىگەردىڭ جوسپارعا سايكەس، بيىل جىل سوڭىنا دەيىن تاۋكە حان، روزىباقييەۆ، تەرمە كوشەلەرىندەگى العاشقى ۋچاسكەنى تاپسىرۋى ءتيىس ەكەنىن، ال بارلىق جۇمىستى 2024 جىل IV توقساندا اياقتاۋ جوسپارلانىپ وتىرعانىن باياندادى.
قالا باسشىسى اۋدان اكىمىنە، ەنەرگەتيكا جانە سۋمەن جابدىقتاۋ باسقارماسىنىڭ باسشىلىعىنا «الماتى سۋ» جانە قۇرىلىس باسقارماسىمەن بىرلەسىپ 2018 جىلى ازىرلەنگەن جوبامەن اينالىسۋدى تاپسىردى. قۇجات نوسەر كارىزى بويىنشا جاڭا نورمالاردى جانە باسقا دا پارامەترلەردى ەسكەرە وتىرىپ، جاڭارتۋدى قاجەت ەتەدى. ەربولات دوسايەۆ سونىمەن قاتار، الداعى كوكتەمدە جول توسەمىن تولىق قالپىنا كەلتىرىپ، بارلىق قىزمەتتىڭ جۇمىسىن ۇيلەستىرۋ قاجەتتىگىن اتادى.
«ءبىر جەردى ەكى رەت قازباس ءۇشىن ءبارىن ەسەپتەۋ كەرەك. وكىنىشكە قاراي، بىزدە كوپتەگەن جوبا ەسكى. ولاردى جاڭا ستاندارتتارعا سايكەستەندىرۋ قاجەت. بۇرىن بىزدە ينجەنەرلىك جەلىلەردى ترانشەيا ادىسىمەن توسەۋ كەزىندە تەك ترانشەيا قالپىنا كەلتىرىلدى. بىزگە جول توسەمىنىڭ ەنىن قالپىنا كەلتىرۋ كەرەك. ينجەنەرلىك جەلىلەر مەن ارىق جۇيەسىن توسەۋ، جول توسەمىن قالپىنا كەلتىرۋ جانە ودان ءارى كوگالداندىرۋ سىندى بارلىعىن ۇيلەستىرۋ قاجەت»، - دەدى الماتى اكىمى ەربولات دوسايەۆ.
اۋەزوۆ اۋدانىنداعى بارلىعى 4 ۋچاسكەدە سۋمەن جابدىقتاۋ جانە سۋ بۇرۋ جەلىلەرىن جاڭعىرتۋ قاجەت. 1960-1970 جىلدارى سالىنعان ينجەنەرلىك جەلىلەر 90% توزعان.
جۇمىس ساپارى بارىسىندا قالا باسشىسى اۋەزوۆ اۋدانىنىڭ تۇرعىندارىمەن كەزدەستى. ەربولات دوسايەۆ ارىق جەلىسىن سالۋ بويىنشا توقتاتىلعان جۇمىس 2024 جىلدىڭ كوكتەمىندە قولعا الىنىپ، بارلىق جول توسەمى قالپىنا كەلتىرىلەتىنىن حابارلادى.
سونىمەن قاتار، قالا اكىمى ياسساۋي مەن جاندوسوۆ كوشەلەرىنىڭ قيىلىسىنداعى №158 مەكتەپتى جوندەۋ ماسەلەسىنە تۇسىنىكتەمە بەردى. جۇرگىزىلگەن ساۋالناماعا سايكەس، مەكتەپ اپاتتى دەپ تانىلدى. ءقازىر وقۋشى ورىندارىن كوبەيتىپ، قايتا قۇرۋ ماسەلەسى پىسىقتالىپ جاتىر. بۇعان قوسا، ياسساۋي جانە تولە بي كوشەلەرىنىڭ ماڭىندا سكۆەر جانە شالياپين كوشەسىندە ارنالعان بالالار الاڭىن قۇرۋدى دا تۇرعىنداردىڭ وتىنگەن بولاتىن. ەربولات دوسايەۆ 2024 جىلعا «حالىق قاتىساتىن بيۋدجەت» باعدارلاماسىن قارجىلاندىرۋدى ۇلعايتۋ جوسپارلانىپ وتىرعانىن، وعان سايكەس تۇرعىندار بالالار الاڭدارى مەن سەرۋەندەۋ ايماقتارىن قۇرۋ جانە اباتتاندىرۋ بويىنشا يدەيالاردى ۇسىنىپ، ىسكە اسىرا الاتىنىن ايتتى.
«كەلەسى جىلى «حالىق قاتىساتىن بيۋدجەت» بويىنشا: قالانىڭ التى اۋدانىنا 2 ملرد تەڭگە جانە الاتاۋ مەن ناۋرىزباي اۋداندارىنا 2،5 ملرد تەڭگە سوماسىن كوبەيتۋدى جوسپارلاپ وتىرمىز. بۇل ءارتۇرلى يدەيالاردى جۇزەگە اسىرۋ مۇمكىندىگىن ارتتىرادى»، - دەدى ەربولات دوسايەۆ.