الماتىنىڭ اۋەزوۆ اۋدانىندا جاڭا ەمحانا سالۋ ءۇشىن جەر ۋچاسكەسى ساتىپ الىندى

ەربولات دوسايەۆ اۋەزوۆ اۋدانىنداعى №18 ەمحانانىڭ جاڭا عيماراتىنىڭ قۇرىلىس الاڭىندا بولدى.

الماتى اكىمى ەربولات دوسايەۆ جۇمىس ساپارى بارىسىندا 340 كەلۋشىگە ارنالعان بولاشاق ەمحانانىڭ قۇرىلىس الاڭىن ارالادى. اۋدانى 0،5 گا جەر ۋچاسكەسى مەديسينالىق مەكەمەلەردىڭ جۇكتەمە ماسەلەسىن شەشۋ ءۇشىن جەكە تۇلعادان ساتىپ الىندى، دەپ حابارلايدى Almaty-akshamy.kz.

ەسكىرگەن «دۋبوكتىڭ» ورنىنا №18 قالالىق ەمحانانىڭ جاڭا فيليالى سالىنادى. ءقازىر شاعىن اۋداننىڭ 11 مىڭعا جۋىق تۇرعىندارى مەديسينالىق قىزمەت الاتىن عيماراتقا 45 جىل تولدى. ول مەديسينالىق مەكەمەلەرگە قويىلاتىن زاماناۋي تالاپتارعا ساي ەمەس، ەنەرگيامەن، جىلۋمەن، سۋمەن جابدىقتاۋ جۇيەلەرى ابدەن توزعان. جاڭا ەمحانادا پاسيەنتتەرگە دياگنوستيكالىق قىزمەت كورسەتۋ، سونداي-اق كۇندىزگى ستاسيونار قىزمەتتەرى قولجەتىمدى بولادى، كەزەكتە تۇرعاندارعا ارنالعان ورىندار كوزدەلەدى، اۆتوموبيل تۇراعى ۇيىمداستىرىلادى.

قالا باسشىسى ەمحانانىڭ كىرەبەرىسىنە نازار اۋداردى: ازاماتتارعا ىڭعايلى جانە كەپتەلىستەردى بولدىرماۋ ءۇشىن ەربولات دوسايەۆ ەكى جاقتى قوزعالىس جانە ەكى جاققا دا ەركىن ءوتۋ مۇمكىندىگى بار جولدى ۇزارتۋ ماسەلەسىن پىسىقتاۋدى تاپسىردى. 

مامىر ش/ا-دا اۋەزوۆ اۋدانىنىڭ تۇرعىندارى ءۇشىن ەمحانانىڭ تەحنولوگيالىق جابدىقتالعان قوسىمشا فيليالى اشىلدى. اۋەزوۆ اۋدانىنىڭ اۋماعىندا بارلىعى 11 مەملەكەتتىك مەديسينالىق ۇيىم جۇمىس ىستەيدى، ولارعا 261،1 مىڭ ادام تىركەلگەن. سونداي-اق 38 جەكە مەديسينالىق مەكەمە جۇمىس ىستەيدى.