الماتىنىڭ بوستاندىق اۋدانىندا ماركوۆ كوشەسىنىڭ ءبىر بولىگىندە 4 تامىزعا دەيىن قوزعالىس شەكتەلەدى، - دەپ حابارلايدى aqshamnews.kz ءتىلشىسى.
الداعى جىلىتۋ ماۋسىمىنا دايىندىق جۇمىستارىن جۇرگىزۋ كەزىندە الماتىنىڭ بوستاندىق اۋدانىندا جىلۋ جەلىلەرىن جوسپارلى جاڭعىرتۋ جۇرگىزىلۋدە. وسى جۇمىستار اياسىندا 1983 جىلى پايدالانۋعا بەرىلگەن ۇزىندىعى 1،5 شاقىرىم بولاتىن جىلۋ تراسساسى اۋىستىرىلىپ جاتىر.
وسىعان بايلانىستى، 2025 جىلى 1 تامىز ساعات 11:00 باستاپ 4 تامىز ساعات 07:00 دەيىن ماركوۆ كوشەسى مەن بۇقار جىراۋ بۋلۆارىنىڭ قيىلىسىندا كولىك قوزعالىسى ۋاقىتشا جابىلادى.
كورسەتىلگەن كوشەنىڭ استىمەن وتەتىن ماگيسترالدىق قۇبىردى جاڭارتۋعا قاتىستى جوسپارلى جۇمىستىڭ قاۋىپسىزدىگىن قامتاماسىز ەتۋ ءۇشىن شەكتەۋ ەنگىزىلەدى. جاڭارتۋ جۇمىستارىن جۇرگىزۋ كەزىندە تۇتىنۋشىلارعا ىستىق سۋ بەرۋ توقتاتىلمايدى.
بۇل جىلۋ جەلىسى 128 كوپپاتەرلى ءۇيدىڭ تۇرعىنىن، 25 جەكە تۇرعىن ءۇي، 2 بالاباقشا، 1 مەكتەپ، 1 دەنساۋلىق ساقتاۋ جانە باسقا دا 65 نىسان ءۇشىن جىلۋ قۋاتىن بەرىپ، ىستىق سۋمەن جابدىقتاۋدى قامتاماسىز ەتەدى.
جالپى، بيىل قالا بويىنشا 39 شاقىرىم جىلۋ جەلىلەرىن جاڭعىرتۋ جوسپارلانعان. بۇل توزۋ دەڭگەيىن 54% دەيىن ازايتۋعا مۇمكىندىك بەرەدى.
ەستەرىڭىزگە سالا كەتەيىك، كولىك قوزعالىسىن شەكتەۋگە قاتىستى بارلىق اقپارات Almaty.kz سايتىندا، @AlmatyJoly Telegram-ارناسىندا، اۋدان اكىمدىكتەرى مەن باسقارمالاردىڭ الەۋمەتتىك جەلىلەرىندە، سونداي-اق، «2GIS» جانە «ياندەكس كارتالار» سەرۆيستەرىندە جاريالانعان.