الماتىدا اۆتوسالوندارعا تۇتىنۋشىلار قۇقىقتارىن بۇزعانى ءۇشىن ايىپپۇل سالىندى
المالى اۋدانىنىڭ پروكۋراتۋراسى اۆتوسالونداردىڭ قىزمەتىنە تالداۋ جۇرگىزىپ، زاڭ بۇزۋشىلىقتاردى انىقتادى، دەپ حابارلايدى aqshamnews.kz.
قالالىق پروكۋراتۋرا مالىمەتتەرىنە ساي، كەيبىر اۆتوسالوندار كولىك ساتىپ الۋشىلارعا دابىل جۇيەسى، اينەكتى قاراڭعىلاۋ، توسەنىشتەر سەكىلدى قوسىمشا قىزمەتتەردى ءماجبۇرلى تۇردە قوسىپ، ارتىق تولەم جاساۋعا يتەرمەلەگەن.
وسىعان بايلانىستى «Toyota Tsusho Kazakhstan Auto» جشس-نا 88 ملن تەڭگەدەن استام ايىپپۇل سالىندى. قازىرگى ۋاقىتتا بۇل سوما تولىق كولەمدە تولەندى.
قازاقستان زاڭناماسىنا سايكەس، اۆتوسالوندار قوسىمشا قىزمەتتەردى تۇتىنۋشىنىڭ كەلىسىمىنسىز ماجبۇرلەي المايدى. ەگەر ءسىز وسىنداي جاعدايعا تاپ بولساڭىز، پروكۋراتۋرا نەمەسە باسقا ۋاكىلەتتى ورگاندارعا شاعىمدانا الاسىز.