سايران سايفەدەنوۆ وڭىرلىك كوممۋنيكاسيالار قىزمەتىنىڭ باسپا ءسوز كونفەرەنسياسىندا الماتىنىڭ اۋەزوۆ اۋدانىندا مەكتەپتەر مەن بالاباقشالارداعى ورىن تاپشىلىعى ماسەلەسىنىڭ قالاي شەشىلىپ جاتقانىن ايتتى، دەپ حابارلايدى almaty-akshamy.kz.
اۋدان اكىمى جاڭا كورپۋستاردىڭ اۋدانداعى قولدانىستاعى مەكتەپتەردىڭ جۇكتەمەسىن تومەندەتۋگە كومەكتەسەتىنىن حابارلادى. مەكتەپتەر بىرنەشە جىل قاتارىنان كەڭەيىپ كەلەدى.
سايران سايفەدەنوۆتىڭ ايتۋىنشا، اۋەزوۆ اۋدانىنداعى 33 مەملەكەتتىك مەكتەپتە 49 مىڭنان استام وقۋشى، 10 جەكەمەنشىك مەكتەپتە 1700-دەن استام وقۋشى بار.
وقۋشى ورىندارىنىڭ ەڭ ۇلكەن تاپشىلىعى 2019 جىلى بولدى – 6 299 ورىن. الايدا، مامىر شاعىناۋدانىنداعى №202 مەكتەپتىڭ (1200 ورىنعا) جانە اقساي شاعىناۋدانىنداعى №123 مەكتەپتىڭ جاڭا كورپۋستارىنىڭ (400 ورىنعا) پايدالانۋعا بەرىلۋى ارقاسىندا ازايدى. سوندىقتان وتكەن جىلى 4 699 ورىن تاپشى بولدى.
«جاڭا وقۋ جىلىندا ورىن جەتىسپەۋشىلىگىن بولدىرماۋ ءۇشىن 3600 وقۋشىعا ارنالعان №6، 117، 121، 132، 133 مەكتەپتەردىڭ جاڭا عيماراتتارىنىڭ قۇرىلىسىن قىركۇيەككە دەيىن اياقتاۋ جوسپارلانۋدا. ءبىز سونداي-اق 400 ورىندى ەكى جەكە مەكتەپ اشۋدى جوسپارلاپ وتىرمىز. 2021 جىلدىڭ سوڭىندا پايدالانۋعا بەرىلگەننەن كەيىن تاپشىلىق 1099 ورىندى قۇرايدى»، - دەدى سايران سايفەدەنوۆ.
اۋداندا مەكتەپكە دەيىنگى مەكەمەلەردە ورىن تاپشىلىعى ماسەلەسى بەلسەندى تۇردە شەشىلۋدە. بۇگىندە اۋەزوۆ اۋدانىندا 147 بالاباقشا مەن شاعىن ورتالىقتار جۇمىس ىستەيدى – 16 509 بالا. بۇل رەتتە تاپشىلىق 10 799 ورىنعا تەڭ.
«ءبىز جاڭا بالاباقشالار سالۋ ارقىلى بۇل تاپشىلىقتى ازايتۋ ءۇشىن بەلسەندى شارالار قولدانامىز. بيىل 662 ورىندى 9 جەكە بالاباقشا اشىلدى»، - دەدى س. سايفەدەنوۆ.
№23 جانە №186 بالاباقشالاردا كۇردەلى جوندەۋ اياقتالدى. سونداي-اق، «التىن بەسىك» شاعىناۋدانىندا 120 ورىندى بالاباقشا قۇرىلىسىنىڭ جوبالىق-سمەتالىق قۇجاتتارى ازىرلەنۋدە. قازىرگى ۋاقىتتا جايلى قالالىق ورتا باسقارماسى ارقىلى بالاباقشا قۇرىلىسىن جوبالاۋ جۇمىستارى جۇرگىزىلۋدە.