اۋەزوۆ اۋدانىنىڭ اكىمى سايران سايفەدەنوۆ وڭىرلىك كوممۋنيكاسيالار قىزمەتىنىڭ باسپا ءسوز كونفەرەنسياسى بارىسىندا جىل سوڭىنا دەيىن قانداي جولداردىڭ جاڭارتىلاتىنىن جانە اۋدان كوشەلەرىن جارىقتاندىرۋ ماسەلەسى قالاي شەشىلىپ جاتقانىن ايتتى.
سايران سايفەدەنوۆتىڭ ايتۋىنشا، اۋداندا جول تەسىكتەرىن اعىمدىق جوندەۋ جۇمىستارى بەلسەندى تۇردە جۇرگىزىلۋدە. ءقازىردىڭ وزىندە 13،5 مىڭ م2 شۇڭقىر جوندەلدى، 749 اقاۋ جويىلدى، دەپ حابارلايدى Almaty-akshamy.kz
جالپى ۇزىندىعى 21،5 شاقىرىمدى قۇرايتىن 33 كوشەدە ورتاشا جول جوندەۋدىڭ ءبىرىنشى كەزەڭىندە جۇمىستار جۇرگىزىلۋدە.
سونىمەن قاتار تولە بي كوشەسىنىڭ ۇزىندىعى 3،5 شاقىرىم بولاتىن جولدارىن ورتاشا جوندەۋدىڭ ەكىنشى كەزەڭىنە كونكۋرستىق شارالار جۇرگىزىلۋدە.
«بيىل ۇزىندىعى 15 كم بولاتىن جاياۋ جۇرگىنشىلەر جولىن اباتتاندىرۋ جوسپارلانعان، بۇگىندە 9،5 كم اياقتالدى. جۇمىس قاراشا ايىنىڭ سوڭىنا دەيىن اياقتالادى»، - دەدى سايران سايفەدەنوۆ.
سونىمەن قاتار، ارىقتاردى جوندەۋ ماسەلەسى جۇزەگە اسىرىلۋدا. اۋدان اكىمدىگىنە 121 شاقىرىم ارىق تيەسىلى. بيىل شالياپين كوشەسىن ورتاشا جوندەۋ اياسىندا 1 كم سۋارمالى ارىق جەلىسى اۋىستىرىلدى. سونداي-اق 42،6 شاقىرىمدىق ارىق تورابىنىڭ قۇرىلىسىنا كونكۋرستىق شارالار جۇرگىزىلۋدە.
سايران سايفەدەنوۆ كوشەلەردى ساپالى جارىقتاندىرۋ اۋداندى اباتتاندىرۋداعى باسىم ماسەلەنىڭ ءبىرى ەكەنىن ايتتى.
«كوشەنى جاقسى جارىقتاندىرۋ قالالىق ورتانى جاقسارتادى، ادامدارعا جايلىلىق پەن قاۋىپسىزدىكتى قامتاماسىز ەتەدى. ءبىزدىڭ اۋداندا سىرتقى جارىقتاندىرۋ جەلىسىنىڭ ۇزىندىعى 410 شاقىرىمدى قۇرايدى، بۇل 14 مىڭ جارىق نۇكتەسىنەن اسادى. اۋەزوۆ اۋدانىندا ءبىرىنشى جارتىجىلدىقتا جارتىلاي جارىقتاندىرىلماعان 89 جەرگە تاعى 1166 شام ورناتىلدى»، - دەدى اۋدان اكىمى.
ول ەسكى شامدار زاماناۋي 1341 جارىقديودتى شامدارعا اۋىستىرىلاتىنىن، ولار اۋداننىڭ 9 كوشەسىندە (اباي داڭعىلى، التىنسارين داڭعىلى، شالياپين كوشەسى، ايريحي كوشەسى، قابدولوۆ-مارعۇلان كوشەسى، جۇبانوۆ كوشەسى، ياسساۋي كوشەسى، ۇلىقبەك كوشەسى، ەلەمەسوۆ كوشەسى) پايدا بولاتىنىن ايتتى. قازىرگى كەزدە اۋىستىرۋ جۇمىستارى 15%-عا ورىندالدى.
سونىمەن قاتار بيىل دوستىق شاعىناۋدانىنىڭ 7 كوشەسىنە سىرتقى جارىق جەلىسىن سالۋ جوسپارلانۋدا، مۇندا 198 شام ورناتىلادى.