الماتى اكىمى اۋەزوۆ اۋدانىنداعى جاڭا الەۋمەتتىك نىساندار تۋرالى ايتتى
اۋەزوۆ اۋدانى تۇرعىندارىنىڭ دەنساۋلىعىن قامتاماسىز ەتۋ جانە دەنساۋلىق ساقتاۋ جۇيەسىنىڭ تيىمدىلىگىن ارتتىرۋ ماقساتىندا مەديسينالىق قىزمەتتىڭ ساپاسىن جاقسارتۋ ماسەلەسى قالا اكىمدىگىنىڭ تۇراقتى باقىلاۋىندا. بۇل تۋرالى الماتى اكىمى ەربولات دوسايەۆ اۋدان تۇرعىندارىمەن كەزدەسۋ بارىسىندا مالىمدەدى.
قالا باسشىسىنىڭ ايتۋىنشا، 2025 جىلدىڭ ءساۋىر ايىندا تاۋگۇل-3 شاعىن اۋدانىندا ورنالاسقان №18 قالالىق ەمحانانىڭ فيليالىنىڭ كۇردەلى جوندەۋى اياقتالادى. سونداي-اق، №16 قالالىق ەمحانادا سەيسميكالىق كۇشەيتۋ جۇمىستارىمەن بىرگە كۇردەلى جوندەۋ جۇرگىزىلۋدە. 2024 جىلدىڭ مامىر ايىندا №2 كورپۋستىڭ ب بلوگىنىڭ جوندەۋى اياقتالادى، ال ماۋسىم ايىندا №1 كورپۋس پەن ا بلوگىندا جوندەۋ جۇمىستارى باستالادى. بۇل جەرگىلىكتى تۇرعىندار ءۇشىن مەديسينالىق قىزمەتتىڭ قولجەتىمدىلىگى مەن ساپاسىن ارتتىرۋعا مۇمكىندىك بەرەدى.
بۇعان قوسا، اقپان ايىندا جەتىسۋ-3 شاعىن اۋدانىندا «پاراسات» الەۋمەتتىك قىزمەت كورسەتۋ ورتالىعىنىڭ جاڭا عيماراتى اشىلدى. جالپى اۋماعى 1760 شارشى مەتر بولاتىن بۇل ورتالىق ەرەكشە قاجەتتىلىگى بار بالالاردى وڭالتۋعا ارنالعان زاماناۋي قۇرال-جابدىقتارمەن قامتاماسىز ەتىلگەن.
ايتا كەتەيىك، 2024 جىلى الماتىدا مامىر، كەمەل جانە نۇرشاشقان شاعىن اۋداندارىندا ءۇش العاشقى مەديسينالىق-سانيتارلىق كومەك ورتالىعى جانە بالالار شۇعىل مەديسينالىق جاردەم ورتالىعىنىڭ جاڭا قابىلداۋ بولىمشەسى پايدالانۋعا بەرىلدى.
سونىمەن قاتار، سايالى شاعىن اۋدانىندا ەمحانا، ايباسوۆ كوشەسىندە العاشقى مەديسينالىق-سانيتارلىق كومەك ورتالىعى جانە №4 جەدەل جاردەم قوسالقى ستانسياسى سالىنىپ جاتىر. №4 قالالىق كلينيكالىق اۋرۋحانانى، سونداي-اق بوستاندىق جانە ناۋرىزباي اۋداندارىنداعى ەمحانالاردى رەكونسترۋكسيالاۋ جوبالارىنا وڭ ساراپتامالىق قورىتىندى بەرىلدى.
2024 جىلدىڭ جەلتوقسان ايىندا دەنساۋلىق ساقتاۋ مينيسترلىگىمەن بىرلەسىپ، 2030 جىلعا دەيىن مەديسينالىق نىسانداردى سالۋ جانە جاڭارتۋ بويىنشا كەزەڭ-كەزەڭمەن ىسكە اساتىن جوسپار بەكىتىلدى. جوسپارعا سايكەس، 32 جاڭا دەنساۋلىق ساقتاۋ نىسانى سالىنىپ، 14 مەكەمە جاڭعىرتىلادى.