قالا اكىمى ەربولات دوسايەۆ اۋەزوۆ اۋدانىن تۇراقتى ەلەكترمەن جابدىقتاۋ ءۇشىن قابىلدانىپ جاتقان شارالار تۋرالى ايتىپ بەردى.
الماتى اكىمى ەربولات دوسايەۆ اۋەزوۆ اۋدانىنىڭ تۇرعىندارىمەن وتكەن ەسەپتىك كەزدەسۋدە ەلەكتر جەلىلەرىن جاڭعىرتۋ تۋرالى ايتتى، دەپ حابارلايدى almaty-akshamy.kz.
وسىلايشا بيىل 36 كم ەلەكترمەن جابدىقتاۋ جەلىلەرى مەن 79 ترانسفورماتورلىق قوسالقى ستانسيا، 5 تاراتۋ قوسالقى ستانسياسىن جاڭعىرتۋ اياقتالادى. سونداي-اق، مومىش ۇلى، شالياپين مەن رىسقۇلبەكوۆ كوشەلەرىندە ۇزىندىعى 7 كم جاڭا ەلەكتر جەلىلەرىنىڭ قۇرىلىسى باستالدى.
سىرتقى ساپالى جارىق جۇيەسىمەن قامتاماسىز ەتۋ بويىنشا جۇمىس جالعاسۋدا: جىل باسىنان بەرى 6،5 كم كابەل جەلىلەرى مەن 806 جارىق نۇكتەلەرى اۋىستىرىلدى. 2024 جىلدىڭ سوڭىنا دەيىن 310 جاڭا جارىقتاندىرۋ تىرەكتەرىن ورناتۋ، 100 سىرتقى جارىقتاندىرۋدى باسقارۋ شكافتارىن جوندەۋ، 35،5 كم ەسكى كابەل جەلىلەرىن جانە 1700 ەسكى ۇلگىدەگى شامداردى جاڭا جارىقديودتى شامدارعا اۋىستىرۋ جوسپاردا بار.
«اۋداندى ساپالى سىرتقى جارىقتاندىرۋمەن تولىق قامتۋ ءۇشىن وسى جىلدىڭ ناۋرىز ايىندا سىرتقى جارىقتاندىرۋ جەلىلەرىنىڭ ۋچاسكەسىن سالۋعا 81 جوبالاۋ-سمەتالىق قۇجاتتاما ازىرلەۋ باستالدى. تامىز ايىندا مەملەكەتتىك ساراپتامانىڭ قورىتىندىسىن الۋدى جوسپارلاپ وتىرمىز. بۇل اتالعان جوبالاردى ىسكە اسىرۋ اۋدان اۋماعىن 2025 جىلدىڭ سوڭىنا دەيىن 100% سىرتقى جارىقتاندىرۋمەن قامتاماسىز ەتۋگە مۇمكىندىك بەرەدى»، - دەپ اتاپ ءوتتى ەربولات دوسايەۆ.