الماتىداعى بورالداي جانە راحات-مادەنيەت شاعىن اۋداندارىندا بيىل مامىر ايىندا 50 كم جاڭا جولدىڭ قۇرىلىسى باستالادى
الاتاۋ اۋدانىنىڭ تۇرعىندارىمەن كەزدەسۋ بارىسىندا الماتى اكىمى ەربولات دوسايەۆ جول-كولىك ينفراقۇرىلىمىن دامىتۋ باعىتىندا اتقارىلىپ جاتقان جۇمىستار تۋرالى ايتتى.
قالا باسشىسىنىڭ ايتۋىنشا، 2024 جىلى اۋداننىڭ 66 كوشەسى، جالپى ۇزىندىعى 41،7 كم جول ورتاشا جوندەۋدەن وتكەن، ال بيىلعى جىلى 18 شاعىن اۋداندا 81 كم جول جوندەۋ جوسپارلانعان.
سونداي-اق، وتكەن جىلى اعىمداعى جوندەۋ اياسىندا 30 مىڭ شارشى مەتر جول توسەمى قالپىنا كەلتىرىلىپ، 12 كم تەحنيكالىق تروتۋار سالىنعان. 2025 جىلى تاعى 30 مىڭ شارشى مەتر جول جانە 9 كم تروتۋار جوندەۋ جوسپارلانىپ وتىر.
«وتكەن جىلدىڭ قاراشاسىندا ءبىز موڭكە بي مەن ساين كوشەلەرىنىڭ قيىلىسىنداعى جولايىرىقتى اياقتادىق، بۇل قالانىڭ نەگىزگى ماگيسترال كوشەلەرىندەگى كولىك جۇكتەمەسىن 20%-عا ازايتۋعا مۇمكىندىك بەردى. بيىلعى جىلدىڭ قاراشاسىنا دەيىن ساين كوشەسىن ۇزارتۋ جۇمىسىن اياقتاۋدى جوسپارلاپ وتىرمىز. جاڭا شاعىن اۋدانداردىڭ جول ينفراقۇرىلىمىن دامىتۋعا ەرەكشە كوڭىل بولىنۋدە. بيىل مامىر ايىندا بورالداي جانە راحات-مادەنيەت شاعىن اۋداندارىندا جالپى ۇزىندىعى 50،6 كم جاڭا جول قۇرىلىسى باستالادى، اياقتالۋ مەرزىمى — 2026 جىلدىڭ قاراشاسى»، – دەدى ەربولات دوسايەۆ.
الماتى اكىمى سونداي-اق، 2024 جىلى قوعامدىق كولىك قىزمەتىنىڭ ساپاسىن ارتتىرۋ ماقساتىندا اۋدان بويىنشا اۆتوبۋس سانى 1 221-دەن 1 467-گە دەيىن ارتقانىن ايتتى. بۇل 11 جاڭا مارشرۋت اشۋعا، 30 مارشرۋتقا قوسىمشا اۆتوبۋستار قوسۋعا جانە 12 مارشرۋتتى جاڭارتۋعا مۇمكىندىك بەردى.