2024 جىلى الماتىنىڭ الاتاۋ اۋدانىندا 7،5 مىڭ جاڭا جۇمىس ورنى قۇرىلدى
الاتاۋ اۋدانى الماتىداعى ەڭ يندۋستريالدى دامىعان اۋدانداردىڭ ءبىرى رەتىندە ءوز پوزيسياسىن نىعايتىپ كەلەدى – مۇندا قالانىڭ جالپى ونەركاسىپ ءونىمىنىڭ ۇشتەن ءبىرى وندىرىلەدى. 2024 جىلى اۋدان ەكونوميكاسىنا تارتىلعان ينۆەستيسيا كولەمى 360 ملرد تەڭگەگە جەتىپ، 87،3%-عا ارتقان. بۇل تۋرالى الماتى اكىمى ەربولات دوسايەۆ الاتاۋ اۋدانى تۇرعىندارىمەن كەزدەسۋ بارىسىندا مالىمدەدى.
«2024 جىلى بەلسەندى بيزنەس سۋبەكتىلەرىنىڭ سانى 10،2%-عا ءوستى، بۇل ءوز كەزەگىندە سالىق ءتۇسىمىن 31،1%-عا ارتتىرىپ، 7،5 مىڭ جاڭا جۇمىس ورنىن اشۋعا مۇمكىندىك بەردى. 2024 جىلعى بولشەك ساۋدا اينالىمى 6،9%-عا ءوسىپ، 536 ملرد تەڭگە بولدى، ال كوتەرمە ساۋدا اينالىمى 2،5 ەسەگە ارتتى»، – دەدى قالا اكىمى.
ونىڭ ايتۋىنشا، ەكونوميكانىڭ بەلسەندى دامۋىنىڭ ناتيجەسىندە 2024 جىلى الاتاۋ اۋدانىنىڭ بيۋدجەتى شامامەن 40%-عا ءوسىپ، 43،7 ملرد تەڭگەگە جەتتى، ال 2025 جىلى تاعى 30%-عا ۇلعايىپ، شامامەن 57 ملرد تەڭگەنى قۇرادى.
«2025 جىلى الماتىنى پوليسەنترلىك مودەل بويىنشا دامىتۋ اياسىندا الاتاۋ اۋدانى ءۇشىن باستى باعىتتار – الەۋمەتتىك نىسانداردىڭ جاياۋ قاشىقتىقتاعى قولجەتىمدىلىگىن قامتاماسىز ەتۋ جانە كەڭەيتۋ، ينجەنەرلىك جانە كولىك ينفراقۇرىلىمىن بەلسەندى دامىتۋ، جايلى ءومىر ءسۇرۋ ورتاسىن قۇرۋ بولىپ قالا بەرەدى»، – دەپ ءسوزىن تۇيىندەدى ەربولات دوسايەۆ.