الماتىنىڭ الاتاۋ اۋدانىندا پرەزيدەنت تاپسىرماسى بويىنشا 11 500 ورىنعا ارنالعان 6 مەكتەپ سالىنادى
بۇل تۋرالى وكق بريفينگىندە الماتىنىڭ حالىق ەڭ كوپ قونىستانعان الاتاۋ اۋدانىنىڭ اكىمى ازامات قالدىبەكوۆ باياندادى. ول بۇگىن مەكتەپ قۇرىلىسى «جايلى مەكتەپ» ۇلتتىق جوباسى اياسىندا جۇزەگە اسىرىلاتىنىن اتاپ ءوتتى، دەپ حابارلايدى اlmaty-akshamy.kz.
جاڭا جايلى مەكتەپتەر تەرەكتى، قاراسۋ، العاباس، اقبۇلاق، سامعاۋ جانە ايگەرىم شاعىن اۋداندارىندا پايدا بولادى. قۇرىلىستى جۇرگىزۋ 2023-2024 جىلدارعا جوسپارلانعان.
ا. قالدىبەكوۆتىڭ مالىمەتىنشە، اۋداندا بارلىعى 30 مەملەكەتتىك مەكتەپ جانە 8 جەكەمەنشىك مەكتەپ بار. بارلىعى 57 146 وقۋشى وقيدى (مەملەكەتتىك مەكتەپتەردە – 55 751 وقۋشى، جەكەمەنشىك مەكتەپتەردە - 1395). بۇل رەتتە وقۋشى ورىندارىنىڭ تاپشىلىعى – 5725. اۋدانداعى تاپشىلىقتى ازايتۋ ءۇشىن مەكتەپتەر سالىنۋدا. سايالى-2 جانە زەردەلى شاعىن اۋداندارىندا ءارقايسىسى 550 ورىندىق ەكى مەكتەپتىڭ قۇرىلىسى جۇرگىزىلۋدە. قۇرىلىس جۇمىستارىن 2024 جىلدىڭ سوڭىنا دەيىن اياقتاۋ جوسپارلانۋدا.
مەكتەپكە دەيىنگى بىلىمگە كەلەتىن بولساق، اۋداندا 20 مەملەكەتتىك جانە 201 جەكەمەنشىك بالاباقشا مەن شاعىن ورتالىقتار بار، ولارعا 19173 بالا بارادى. بۇگىن سايالى-2 شاعىن اۋدانىندا 160 ورىندىق بالاباقشانىڭ قۇرىلىسى اياقتالدى.
بۇدان بولەك، زەردەلى شاعىن اۋدانىندا جالپى اۋدانى 2 730 م2 بولاتىن دەنە شىنىقتىرۋ-ساۋىقتىرۋ كەشەنىنىڭ قۇرىلىسى بويىنشا جۇمىستار اياقتالۋدا. اۋداندا بارلىعى 184 سپورت عيماراتى جۇمىس ىستەيدى.
سونداي-اق، الاتاۋ اۋدانىندا 13 712 بالانىڭ 534 ۇيىرمە مەن سەكسيالارعا تەگىن قاتىسۋ مۇمكىندىگى بار. ولاردىڭ قاتارىندا كينوتەاتر، كىتاپحانالار، اۋلا كلۋبتارى، مۇراجاي، تەاتر، تەننيس ورتالىعى جانە ت.ب. بار.
قورىتىندىلاي كەلە، ازامات قالدىبەكوۆ مەملەكەت باسشىسىنىڭ تاپسىرماسى بويىنشا «100 زاماناۋي وقۋشىلار سارايىنىڭ قۇرىلىسى» باعدارلاماسىن جۇزەگە اسىرۋ اياسىندا اۋداندا يننوۆاسيالىق شىعارماشىلىق ورتالىعى اشىلعانىن، وندا 33 ءتۇرلى ۇيىرمە ۇيىمداستىرىلعانىن، اپتا سايىن 5 مىڭ بالاعا دەيىن قامتىلىپ وتىرعانىن حابارلادى.