الماتى قالاسىنىڭ الاتاۋ اۋدانىندا جول-كولىك ينفراقۇرىلىمىن دامىتۋ ماقساتىندا 60 كوشەدەگى جولدارعا جوندەۋ جۇمىستارى جۇرگىزىلۋدە. جوسپارلانعان 23 مىڭ شارشى مەتردەن 15 مىڭ شارشى مەتر جول جابىنى جوندەلدى. بۇل تۋرالى وكق بريفينگىندە الماتى قالاسى الاتاۋ اۋدانىنىڭ اكىمى ازامات قالدىبەكوۆ مالىمدەدى، دەپ حابارلايدى almaty-akshamy.kz
ەستەرىڭىزگە سالا كەتەيىك، 1 ساۋىردەن باستاپ الماتىداعى اۋدان اكىمدىكتەرى وزدەرىنە سەنىپ تاپسىرىلعان اۋماقتارداعى كوپتەگەن ءىس-شارالاردى دەربەس قارجىلاندىرادى. قازاقستاندا جەرگىلىكتى ءوزىن-وزى باسقارۋدى ورتالىقسىزداندىرۋ پرەزيدەنت قاسىم-جومارت توقايەۆتىڭ تاپسىرماسىنا سايكەس جۇرگىزىلەدى.
بۇگىندە اۋداندا 7 شاعىن اۋدانداعى جولدارعا ورتاشا جوندەۋ جۇمىستارى جۇرگىزىلۋدە جانە ۇزىندىعى 61 كم بولاتىن ف.وڭعارسىنوۆا مەن ن. دانچەنكو اتىنداعى ەكى ۇلكەن كوشەدە جاڭا جولداردىڭ قۇرىلىسى جۇرگىزىلۋدە.
سونداي-اق، اكىم ورتاشا جوندەۋ جۇمىستارى اياقتالعان شاعىن اۋدانداردى اتاپ ءوتتى، ولار: توميريس، قاراسۋ، العاباس، تەرەكتى، اقبۇلاق جانە زەردەلى. سايىن كوشەسىن رىسقۇلوۆ داڭعىلىنان موڭكە بيگە دەيىن ۇزارتۋ جۇرگىزىلۋدە، ۇزىندىعى 3،2 كم. ودان بولەك، سايىن مەن موڭكە بي كوشەلەرىنىڭ قيىلىسىندا تولىق بەدە تۇرىندە جولايرىق سالۋ جۇمىستارى جۇرگىزىلۋدە.
سونىمەن قاتار، بەس جەراستى جاياۋ جۇرگىنشىلەر وتكەلىندە تاس توسەۋىشتەر مەن تاكتيلدى پليتالار ءىشىنارا اۋىستىرىلدى، توبەلەرگە سوفيتتەر، ۆانداليزمگە قارسى جارىقتاندىرۋ قۇرىلعىلارى، مۋزىكالىق جابدىقتار جانە بەينەباقىلاۋ جۇيەسى (رايىمبەك داڭعىلى، مومىش ۇلى كوشەسىنىڭ قيىلىسى - 3 جەراستى وتكەلى؛ مومىش ۇلى كوشەسى رايىمبەك داڭعىلىنان جوعارى - 1 وتكەل؛ رايىمبەك داڭعىلى اقكەنت شاعىن اۋدانىنان بۇرىلىس – 1 وتكەل) ورناتىلدى.
«18 جاياۋ جۇرگىنشىلەر وتكەلىنە كۇردەلى جوندەۋ جۇمىستارى جۇرگىزىلۋدە، وندا سىرتقى جارىقتاندىرۋ شامدارىن اۋىستىرۋ، كوتەرگىش مەحانيزمدەر مەن ەلەكتر جەتەگى بار ليفتتەردى كۇردەلى جوندەۋ، بەينەباقىلاۋ ورناتۋ، اربامەن جانە ۆەلوسيپەدپەن تۇسەتىن ورىنداردى ورناتۋ، ىرگەلەس اۋماقتى كوگالداندىرۋ جانە اباتتاندىرۋ قاراستىرىلعان»، - دەگەن اۋدان باسشىسى كۇردەلى جوندەۋ جۇمىستارى بيىلعى جىل سوڭىنا دەيىن اياقتالاتىنىن ايتتى.
اۋدان باسشىسى ءوز سوزىندە تروتۋارلاردىڭ قۇرىلىسىنا ەرەكشە نازار اۋدارىلعانىن اتاپ ءوتتى. بۇگىنگى تاڭدا جالپى اۋدانى 27 050 ش. م بولاتىن 8 شاعىن اۋداندا تەحنيكالىق تروتۋار سالۋ جۇمىستارى جۇرگىزىلۋدە.
«تروتۋارلاردىڭ قۇرىلىسى تۇرعىندار «كوزيا تروپا» دەپ اتالاتىن جاسىل ايماقتاردا جۇزەگە اسىرىلادى، بۇل شاڭنىڭ كوتەرىلۋىنە اكەلەدى، جەر ەروزياسى پايدا بولادى جانە سۋارۋ جۇيەسى جابدىقتالعان جەرلەردە جابدىقتار زاقىمدالادى»، - دەپ ءتۇسىندىردى ا.قالدىبەكوۆ.
اۋدان باسشىسى ينجەنەرلىك ينفراقۇرىلىمدى دامىتۋ جانە قالپىنا كەلتىرۋ ماسەلەلەرىنە دە توقتالدى. ماسەلەن، جالپى ۇزىندىعى 306،9 كم بولاتىن سەگىز شاعىن اۋداندا قۇرىلىس-مونتاجداۋ جۇمىستارى جوسپارلانۋدا. بيىل بارلىعى العاباس 3-كەزەك، شاپاعات، بولاشاق، راحات-مادەنيەت جانە وجەت سياقتى بەس شاعىن اۋداندا قۇرىلىس-مونتاجداۋ جۇمىستارى باستالدى.