الماتى قالاسىندا 2025 جاڭا جىل قالاي تويلانادى؟
الماتى قالاسى «الماتىنىڭ 8 كەرەمەتى: بۇكىل وتباسىعا ارنالعان سيقىر» اتتى اۋقىمدى جاڭاجىلدىق باعدارلاماعا قىزۋ دايىندىق ۇستىندە. 20 جەلتوقساندا باستالاتىن بۇل مەرەكەلىك شارالارعا قالانىڭ سەگىز اۋدانىنىڭ تۇرعىندارى مەن قوناقتارى قاتىسىپ، مەرەكەنىڭ ءمانىن بىرگە اشادى، دەپ حابارلايدى aqshamnews.kz
جاڭا جىل قارساڭىندا الماتى قالاسى اسەم بەزەندىرىلەدى. باستى كىرەبەرىس – اۋەجايدان باستاپ، ورتالىق الاڭدارعا دەيىن قالانىڭ ءار بۇرىشى مەرەكەلىك كەيىپكە ەنەدى. قالادا 300-گە جۋىق جارىق ينستاللياسيالارى، ەرتەگىلەر كەيىپكەرلەرى مەن مەرەكەلىك سيمۆولدار ورناتىلادى. ونىڭ ىشىندە 120-سى – وتكەن جىلعى جوندەۋدەن وتكەن شاعىن ساۋلەتتىك فورمالار (شاف). ماگيسترال بويىنداعى اعاشتار جارىقديودتى شامدار مەن گيرلياندالارمەن كومكەرىلەدى. بارلىعى 1500 جارىق ەلەمەنتى، ونىڭ ىشىندە 350 قالپىنا كەلتىرىلگەن كرونشتەيندەر الماتىنىڭ باستى كوشەلەرى مەن داڭعىلدارىن كوركەمدەيدى.
قالانىڭ 21 ماڭىزدى عيماراتى ارحيتەكتۋرالىق جارىقتاندىرۋمەن ايشىقتالادى. الماتىنىڭ سيمۆولىنا اينالعان «كوكتوبە» تەلەمۇناراسى دا جاڭاجىلدىق اسەم بەينەمەن بەزەندىرىلىپ، تۇرعىندار مەن تۋريستەرگە ەرەكشە مۋلتيمەديالىق كورىنىس ۇسىنادى.
بيىل الماتىدا العاش رەت نەگىزگى الاڭدارعا ساباقتىق كلاسسيكالىق شىرشالار ورناتىلادى. باستى جاڭاجىلدىق شىرشا، بيىكتىگى 22 مەتر، ءداستۇر بويىنشا رەسپۋبليكا سارايى الدىنداعى اباي الاڭىندا ورناتىلادى. شىرشانى بەزەندىرۋگە 6 شاقىرىم گيرلياندالار، ءىرى اشەكەيلەر مەن ەكولوگيالىق تازا ماتەريالداردان جاسالعان ويىنشىقتار قولدانىلادى.
جالپى قالادا 80-نەن اسا شىرشا ورناتىلادى. ءار شىرشانى اشەكەيلەۋگە 4-6 شاقىرىم گيرلياندا پايدالانىلادى. شىرشالار نەگىزگى ورىنداردا: تۇڭعىش پرەزيدەنت ساياباعىندا، رەسپۋبليكا الاڭىندا، «حالىق ارەنا» مۇز سارايىندا، «الماتى ارەنا» كەشەنىندە، ابىلاي حان اتىنداعى تەاتر الدىندا جانە ناۋرىزباي اۋدانىنىڭ امفيتەاترىندا، سونداي-اق سيرك، ساۋدا ورتالىقتارى مەن ساياباقتاردا پايدا بولادى.
20 جەلتوقساندا ساعات 19:00-دە رەسپۋبليكا سارايى الدىندا الماتىنىڭ باس شىرشاسى سالتاناتتى تۇردە جارىقتاندىرىلادى. شارا بارىسىندا Turar، Dakelot، Adill، مادي رىمبايەۆ، دينايا، Astro توبى، Malika Yes، بالجان بيداش، ALPHA توبى سياقتى ەسترادا جۇلدىزدارى ونەر كورسەتەدى. اياز اتا مەن اقشاقار دا مەرەكەنىڭ باستى قوناقتارى بولادى.
استانا الاڭىندا 22 مەترلىك شىرشا ورناتىلادى، سونداي-اق اياز اتانىڭ ۇلتتىق ناقىشتا بەزەندىرىلگەن عاجايىپ ۇيشىگى اشىلادى. بارلىق قالا تۇرعىندارى وسى ۇيشىككە كىرىپ، مەرەكەلىك كوڭىل-كۇيگە بولەنە الادى.
ءال-فارابي داڭعىلىنداعى «نۇرلى تاۋ» بيزنەس-ورتالىعىنىڭ الدىندا 20 جەلتوقساندا مەرەكەلىك جارمەڭكە اشىلىپ، 26-31 جەلتوقسان ارالىعىندا live-band توپتارى ونەر كورسەتەدى.
الماتىلىق اربات كارنابي-ستريت ستيلىندە بەزەندىرىلىپ، جۇلدىزدار مەن شارلار كومپوزيسيالارى ورناتىلادى. ارباتتا 20-31 جەلتوقسان ارالىعىندا شىرشا جارمەڭكەسى وتەدى. جەرگىلىكتى سۋرەتشىلەردىڭ كورمەسى، وتباسىلىق ويىندار مەن مۋزىكانتتاردىڭ قويىلىمدارى ۇيىمداستىرىلادى.
مەملەكەتتىك قۋىرشاق تەاترى 20-30 جەلتوقسان ارالىعىندا «سيقىرلى اينا» باعدارلاماسى مەن گانس حريستيان اندەرسەننىڭ «قار حانشايىمى» سپەكتاكلىن ۇسىنادى.
الماتىلىق سيرك 21 جەلتوقساننان 21 قاڭتارعا دەيىن لازەرلىك شوۋ مەن «قار حانشايىمى» قويىلىمىن ۇسىنادى. باعدارلاما اياسىندا ماسكەۋدىڭ نيكۋلين سيركى مەن يسپانيانىڭ ايگىلى كلوۋنى ونەر كورسەتەدى.
بارلىق 8 اۋداندا اياز اتا مەن ەرتەگى كەيىپكەرلەرىنىڭ شەرۋى، كورمەلەر، كونسەرتتەر جانە ويىن-ساۋىق باعدارلامالارى ۇيىمداستىرىلادى. الماتى قالاسىن جاڭاجىلدىق بەزەندىرۋگە 800 ميلليون تەڭگە ءبولىندى. وتكەن جىلعى دەكوراسيالاردى قالپىنا كەلتىرىپ، جاڭا شارالارعا مادەنيەت مەكەمەلەرىن تارتۋ ارقىلى بيىلعى مەرەكە وتكەن جىلعا قاراعاندا اۋقىمدى ءارى ءساندى بولادى.
الماتى قالاسىندا جاڭا 2025 جىلعا وراي ۇيىمداستىرىلاتىن جالپىقالالىق ءىس-شارالار جوسپارىمەن تومەندەگى سىلتەمە ارقىلى تانىسا الاسىزدار.
جاڭا جىل الماتىدا ەرەكشە كوڭىل-كۇي سىيلاپ، بارشا قالا تۇرعىندارى مەن قوناقتارىن قۋانتپاق!