ءبىز ءۇشىن ءبىزدىڭ سپورتشىلاردىڭ بارلىعى دا ناعىز چەمپيوندار!
قازاقستاننىڭ اقپارات جانە دامۋ ءمينيسترى ايدا بالايەۆا وليمپياداعا قاتىسىپ جاتقان وتاندىق سپورتشىلاردى قولداۋعا شاقىردى، دەپ حابارلايدى Almaty-akshamy.kz.
«وكىنىشكە وراي، بۇگىندە توكيو وليمپياداسىنداعى كەيبىر سپورتشىلارىمىزدىڭ ساتسىزدىگىنە كوپشىلىك جاعىمسىز پىكىرلەر مەن تىم ادىلەتسىز سىن ايتىپ جاتىر. ونىڭ ىشىندە بۇعان دەيىنگى جارىستاردا ەلىمىزدىڭ اتىن تورتكۇل دۇنيەگە تانىتىپ جۇرگەن تانىمال اتلەتتەرىمىزدىڭ دە اتتارى اتالۋدا. مىسالى، 2016 جىلى ريو وليمپياداسىندا ۆاسيليي ليەۆيتتىڭ رينگتەگى ونەرىنە بۇكىل ەلىمىز تامساندى، وعان كورسەتىلگەن ادىلەتسىزدىككە بىرگە جاندارى اۋىردى. وسى جولى ۆاسيليي جەڭىلدى، ءبىراق ونىڭ وسى بەس جىل ىشىندە ەلىمىز ءۇشىن دايىندالىپ، كەزەكتى وليمپيادالىق سيكلدەن ءوتىپ، رينگكە قايتا شىعۋىنىڭ ءوزى قۇرمەتتەۋگە تۇرارلىق شەشىم دەپ سانايمىن»،– دەلىنگەن ءمينيستردىڭ الەۋمەتتىك جەلىدەگى جازباسىندا.
سونىمەن قاتار ايدا بالايەۆا ولگا رىپاكوۆانىڭ دا ەڭبەگىن اتاپ وتكەن.
«ولگا رىپاكوۆانىڭ دا ساتسىزدىگى مەن ونىڭ كاسىبي كارەراسىن اياقتالدى دەگەن اقپارات كوڭىلگە ءتىپتى قاياۋ تۇسىرەدى. ولگا - بۇكىل سانالى عۇمىرىن وتاندىق سپورت جولىنا ارناپ، ەلىمىزدىڭ اتىن تالاي مارتە ءدۇبىرلى دودالاردا اسقاقتاتقان بىردەن ءبىر جەڭىل اتلەت. ول 36 جاسىندا ءوزىنىڭ ءتورتىنشى وليمپياداسىنا قاتىسىپ، ەلىمىزدىڭ نامىسىن كەزەكتى رەت قورعاۋعا شەشىم قابىلدادى. ولار ۇلكەن سپورتتاعى كارەراسىن اياقتاعانىمەن، الداعى ۋاقىتتا وزدەرىنىڭ ءىزىن باسار شاكىرت تاربيەلەۋدە ۇلكەن ەڭبەك ەتەدى دەپ سەنەمىن»، – دەپ جازدى مينيستر.
ايدا بالايەۆا قانداي جاعدايدا دا ۇلى سپورتشىلارىمىزدىڭ جەتىستىكتەرى مەن جەڭىستەرىن ءبىز ەشقاشان ۇمىتپاۋىمىز كەرەك دەپ سانايدى.
«قيىن ساتتەردە قولداۋ كورسەتۋ ارقىلى عانا ءبىز ولارعا سەنىم ۇيالاتىپ، كەلەر كۇندەردىڭ جەڭىستەرىنەن ءۇمىت ەتە الامىز. ءبىز ءۇشىن ءبىزدىڭ سپورتشىلاردىڭ بارلىعى دا ناعىز چەمپيوندار!»،– دەپ جازدى ايدا بالايەۆا.
جاپونيا استاناسى توكيودا ءوتىپ جاتقان وليمپيادالىق ويىنداردا قازاقستان سپورتشىلارى 7 قولا مەدال يەلەندى. قازىرگى كەزدە قازاقستان جالپىكوماندالىق ەسەپتە 76-ورىندا تۇر.
ەسكە سالا كەتسەك، وتاندىق سپورتشىلاردىڭ كورسەتكەن ناتيجەلەرىنا كوڭىلى تولماعان قازاقستاندىقتار الەۋمەتتىك جەلىلەردە «قولا ءداۋىرى باستالدى» دەگەن تاقىرىپپەن سۋرەتتەر سالا باستاعان بولاتىن.