تاعزىم
كەشەگى «قاڭتار وقيعاسى» ءالى دە ۇمىتىلعان جوق. ۇمىتا الماي جۇرگەندەردىڭ ءبىرى، قوعام بەلسەندىسى – گۇلزات اسان قىزى. ول الەۋمەتتىك جاعدايى تومەن، كوپ بالالى وتباسىلارمەن جۇمىس ىستەيدى، سول توپتىڭ مۇڭىن مۇڭداپ، جوعىن جوقتاپ جۇرەتىن جان.
پاندەميا كەزىندە الاتاۋ اۋدانىنداعى «شاڭىراق» ىقشاماۋدانىندا جۇمىسسىز، تابىسسىز، اس-سۋسىز قالعان تالاي وتباسىنا قايىرىمدى جانداردان جينالعان ازىق-تۇلىك پاكەتتەرىن جاياۋ-جالپىلاپ تاسىعانداردىڭ ءبىرى. قالىڭ بۇقاراعا وسىلاي جاقىن جۇرەتىن، ايتار ويى، پىكىرى بار، قورشاعان ورتاسىنا بەي-جاي قاراي المايتىن ساناسى سەرگەك جان بولعاندىقتان، تەلەباعدارلامالار گۇلزاتتى تاۋەلسىز ساراپشى رەتىندە ءجيى شاقىرادى.
ءيا، ول «قاڭتار وقيعاسىن» كوزىمەن كورگەندەردىڭ ءبىرى. كورمەيىن دەسە، بۇرىنعى جۇمىس ورنى – «باقىتتى وتباسى» ورتالىعى دا، ءۇيى دە ءدال «الماتى ارەنانىڭ» تۇبىندە بولدى. بالاسىن قۇشاقتاپ تەرەزە الدىندا تۇرعان سول كۇنى. ءبىر كەزدە كوشەگە شىققان ادامداردىڭ قاراسى قالىڭداپ بارا جاتقانىنا الاڭداپ، شىداماي سىرتقا شىقتى. بىر-ەكى ەر ادام كوشەدە تۇرعان كولىكتەردىڭ دوڭگەلەگىن شەشىپ الىپ جاتىر ەكەن. «بۇلارىڭىز نە، بىرەۋدىڭ مۇلكىندە نەلەرىڭىز بار، دوعارىڭىزدار!» – دەپ ەدى، «شارۋاڭىز بولماسىن، ۇيىڭىزگە بارىڭىز»، – دەدى ءتۇسى سۋىق بۇجىر قارا. گۇلزاتتىڭ جۇرەگى زىرق ەتە قالدى. الگى ادامنىڭ جانارىندا وشپەندىلىك بار سياقتى كورىندى. ءبىراق ونىڭ جان-جاعىن نەگە قيراتىپ جۇرگەنىن تۇسىنە الماي دال. اينالا ۋ-شۋعا تولىپ كەتتى. گۇلزات جۇرەگىنە وكسىك تىعىلىپ، ۇيىنە ارەڭ جەتتى. ءبىر قاراسا، اعىل-تەگىل جىلاپ وتىر ەكەن. نەگە جىلاپ وتىرعانىن ءوزى دە بىلمەيدى. ءبىر بىلەرى – الماتىعا نيەتى بۇزىق ادامدار قاستاندىق جاساپ جاتقانداي، الىپ مەگاپوليس شايقاتىلىپ تۇرعانداي اسەردەن ارىلا المادى. ولاردىڭ بەيبىت نيەتتە شەرۋگە شىققان وتانداستارىمىزدىڭ اراسىنا ىرىتكى سالماق بولعان لاڭكەستەر ەكەنىن كەيىن ءبىلدى عوي.
ارينە، بگىندە ول كۇندەر دە ارتتا قالدى. ءبىراق ۇمىتۋ مۇمكىن ەمەس. الماتىدا رەسپۋبليكا الاڭىندا «قاڭتار وقيعاسىنىڭ» قۇرباندارىنا ارنالعان «تاعزىم» كوپ ساتىلى ساۋلەت كەشەنى اشىلدى دەگەندە، ەرتەڭىنە ارنايى بارىپ كورگەنى دە سوندىقتان. كوڭىلى ءبىر ىسىپ، ءبىر سۋىعانىن دا جاسىرمايدى. سول كۇندەر كوز الدىنان تاعى ءبىر وتە شىققانداي بولعان سەبەبى. ءقازىر بۇكىل ارمان-ماقساتىن جۇزەگە اسىرۋعا دانەكەر بولعان ارۋ الماتى بۇرىنعىسىنان دا كوركەيىپ، كوز الدىندا بيىكتەپ كەلەدى. سوعان قۋانادى.
تاقىرىپقا وراي
گۇلزات اسان قىزى، قوعام بەلسەندىسى: تاسقا قاشالعان تاريح
«تاعزىم» مەموريالىنىڭ اۆتورلارىنا راحمەت، ءساتتى شەشىمدەرگە بارعان. ونداعى ەسكەرتكىش تاستار ءتورت بولىككە بولىنگەن. ماسەلەن، اقشىل سۇر بولىگى – ەڭسەرۋدى، قارا ءتۇس «قاڭتار وقيعاسى» كەزىندەگى ءوزىم كۋاسى بولعان دۇربەلەڭ مەن ۇرەيدى بەينەلەيدى. سۇر بولىگى قۇربان بولعان جازىقسىز جاندار مەن توگىلگەن قاننىڭ سيمۆولى بولسا، اق ءتۇس بولاشاققا، جاقسى كۇندەرگە ۇمتىلۋدى بىلدىرەدى. ءار تاسقا قاشالىپ جازىلعان ۇلى تۇلعالارىمىزدىڭ قاناتتى سوزدەرىن تۇگەل وقىپ شىقتىم. ونىڭ ءبارى - بۇگىنگى ۇرپاققا ونەگە. تاسقا قاشالعان «قاڭتار وقيعاسى» ەشقاشان قايتالانباۋى كەرەك. ەلىمىزدىڭ اماندىعىن، جەرىمىزدىڭ تۇتاستىعىن قورعاۋ – ۇلكەننىڭ دە، كىشىنىڭ دە پەرزەنتتىك پارىزى دەپ بىلەمىن.