مەگاپوليستە تۋبەركۋلەزبەن كۇرەس ايلىعى باستالدى. وسىعان وراي ق ر دەنساۋلىق ساقتاۋ مينيسترلىگى ۇلتتىق فتيزيوپۋلمونولوگيا عىلىمي ورتالىعىنىڭ ديرەكتورى مالىك ادەنوۆتىڭ قاتىسۋىمەن وكق الاڭىندا بريفينگ ءوتتى، دەپ حابارلايدى اlmaty-akshamy.kz.
ماماننىڭ ايتۋىنشا، تۋبەركۋلەز - اۋا ارقىلى ناۋقاس ادامنان جوتەلۋ، تۇشكىرۋ، سويلەسۋ كەزىندە جۇعاتىن ينفەكسيالىق اۋرۋ.
«ادام بۇل اۋرۋدى جۇقتىرعان بولۋى مۇمكىن، ءبىراق سوعان قاراماي، تۋبەركۋلەز باكتەرياسى اعزادا ۇزاق جىلدار بويى ءومىر سۇرە الادى جانە بىلىنبەۋى مۇمكىن، ويتكەنى دەنەنىڭ يممۋندىق جۇيەسى اۋرۋدىڭ ودان ءارى دامۋىنا كەدەرگى كەلتىرەدى. يممۋندىق جۇيە باكتەريالاردىڭ كوبەيۋىنە توتەپ بەرە الماعان كەزدە ادامدار اۋىرادى»، - دەدى م.ادەنوۆ.
اۋرۋدىڭ تۋىنداۋىنا جەتكىلىكسىز نەمەسە تولىقتاي تاماقتانباۋ، تەمەكى شەگۋ، الكوگول نەمەسە ەسىرتكى، اۋىر فيزيكالىق ەڭبەك كۇيزەلىسى، سوزىلمالى اۋرۋلار سەبەپتەرى بولۋى مۇمكىن.
مامان اۋرۋدى كەلەسى بەلگىلەرمەن انىقتاۋعا بولاتىنىن قوستى: 2 اپتادان استام جوتەل، سالماق جوعالتۋ، تەرشەڭدىك، كەۋدەدەگى اۋىرسىنۋ، قان تۇكىرۋ (سيرەك)، جالپى السىزدىك جانە تەز شارشاۋ، ۇزاق ۋاقىت بويى دەنە تەمپەراتۋرانىڭ كوتەرىلۋى.
«ەكى اپتا بويى اتالعان بەلگىلەردىڭ بىرەۋى نەمەسە بىرنەشەۋى بايقالسا دا، ءسىز دەرەۋ تۇرعىلىقتى جەرىڭىز بويىنشا جاقىن جەردەگى مەديسينالىق ۇيىمعا حابارلاسىپ، تۋبەركۋلەزگە تەكسەرىلۋىڭىز كەرەك. دياگنوستيكاعا پتر قاقىرىقتى تالداۋ جانە باسقا دا زەرتحانالىق جانە كلينيكالىق زەرتتەۋلەر كىرەدى»، - دەپ جالعاستىردى وكق سپيكەرى.
ءبىزدىڭ ەلىمىزدە تۋبەركۋلەزدى تەكسەرۋ جانە ەمدەۋ تولىعىمەن تەگىن جانە تەگىن مەديسينالىق كومەكتىڭ كەپىلدىك بەرىلگەن كولەمى اياسىندا جۇزەگە اسىرىلادى.
تۋبەركۋلەز انىقتالعان جاعدايدا، تولىق ەمدەۋ كۋرسىنان ءوتۋ قاجەت جانە بارلىق بايلانىستا بولعان ادامدار كورسەتكىشتەرى بويىنشا پروفيلاكتيكالىق ەمدەۋ كۋرسىنان ءوتۋى كەرەك. تۋبەركۋلەز دەر كەزىندە انىقتالىپ، تولىق ەمدەۋ كۋرسىمەن ەمدەلەدى. تۋبەركۋلەزدى ءساتتى ەمدەۋدىڭ كىلتى - ۇزدىكسىز ەمدەۋ.
الماتىلىقتارعا يممۋندىق جۇيەنى نىعايتۋ، سالاۋاتتى ءومىر سالتىن ۇستانۋ، ۇنەمى تولىققاندى تاماقتانۋ، بولمەنى ءجيى جەلدەتۋ، ىلعالدى تازالاۋ جۇمىستارىن جۇيەلى تۇردە جۇرگىزۋ كەڭەسى بەرىلدى. دەنساۋلىعىڭىز ناشارلاسا، مەديسينالىق كومەككە جۇگىنىڭىز.