الماتىلىقتارعا جۇرگىزۋشى كۋالىگىن الىپ بەرەمىن دەپ الداپ كەتكەن الاياق ۇستالدى

25 جاستاعى ازامات بىرنەشە الاياقتىققا قاتىسى بار دەپ كۇدىكتەلۋدە. 

ءبىرقاتار الاياقتىق جاسادى دەگەن كۇدىكپەن الماتى وبلىسىنىڭ تۋماسى ۇستالدى. جاس جىگىت قالانىڭ كەمىندە جەتى تۇرعىنىن الدادى دەگەن كۇدىككە ءىلىندى. جابىرلەنۋشىلەردىڭ نۇسقاسى بويىنشا، كۇدىكتى جۇرگىزۋشى كۋالىگىن الۋعا كومەكتەسەمىن دەگەن جەلەۋمەن الدىن الا تولەم الىپ، جاسىرىنىپ قالعان، دەپ حابارلايدى Almaty-akshamy.kz Polisia.kz-كە سىلتەمە جاساپ. 

«جەدەل شارالار جۇرگىزىلىپ، كۇدىكتى قاماۋعا الىندى. ءىستى قاراۋ بارىسىندا ونىڭ وسىعان ۇقساس جەتى ەپيزودقا قاتىسى بار بولۋى مۇمكىن ەكەندىگى انىقتالدى. 25 جاستاعى ا.ەسىمدى ازاماتقا قاتىستى ق ر قك-نىڭ 190-بابى 3-بولىگى (الاياقتىق) بويىنشا قىلمىستىق ءىس تىركەلدى»، – دەدى الاتاۋ اۋداندىق پوليسيا باسقارماسىنىڭ باستىعى تالعات بەركىنبايەۆ.

ءبىراق پوليسيا زارداپ شەككەندەردىڭ كوپ بولۋى مۇمكىن ەكەندىگىنە سەنىمدى. ءقازىر تەرگەۋشىلەر ۇستالعان ازاماتتىڭ بۇرىن جاسالعان وسىعان ۇقساس قىلمىسقا قاتىسى بار-جوعىن تەكسەرىپ جاتىر. ق ر قپك-نىڭ 201-بابىنا سايكەس تەرگەۋ مۇددەسىن كوزدەيتىن وزگە دە مالىمەتتەر جاريا ەتۋگە جاتپايدى.