تۇركيادا الاپات جەر سىلكىنىسى بولعان گازيانتەپ وبلىسىنىڭ نۇرداعى اۋدانىندا جاڭا ۇيلەردىڭ العاشقى لەگى بەرىلدى.
14 ءۇيدىڭ كىلتىن تۇرعىندارعا العاشقى بولىپ پرەزيدەنت رەجەپ تايىپ ەردوعان تابىستادى. باسپانا 4 بولمەلى جانە ىستىق، سۋىق سۋ مەن دارەتحاناسى ىشىندە. 40 مىڭنان اسا تۇرعىنى بار نۇرداعى جەر سىلكىنىسىنەن ەڭ قاتتى زارداپ شەككەن اۋدانداردىڭ ءبىرى، دەپ حابارلايدى Almaty-akshamy.kz Qazaqstan.tv ۆەب-سايتىنا سىلتەمە جاساپ.
عيماراتتاردىڭ 90 پايىزدان استامى قيراعان بولاتىن. ءزىلزالادان 44 كۇن وتكەندە قۇرىلىسى اياقتالعان بۇل ۇيلەردەن بولەك، ءقازىر اپات بولعان 11 وبلىستا 650 مىڭ ءۇيدىڭ قۇرىلىسى ءجۇرىپ جاتىر. جىل سوڭىنا دەيىن 320 مىڭعا تارتا باسپانا اپاتتان زارداپ شەككەندەرگە تابىستالادى.
«بۇگىن سىزدەرگە تەك تۇرعىن ءۇي عانا ەمەس، قورا-قوپسىسى، مەشىتى، ساياباعى بار، جاڭا تەحنولوگيامەن جابدىقتالعان «اقىلدى اۋىل» سالىپ بەرىپ وتىرمىز. بۇدان بولەك، مال شارۋاشىلىعىمەن، باۋ-باقشا ەگۋمەن اينالىسامىن دەگەن تۇرعىندارعا پايىزسىز نەسيە بەرەمىز. سونداي-اق، باسقا وڭىرلەردەن وسى جاققا كوشىپ كەلىپ، اۋىل شارۋاشىلىعىمەن اينالىسامىن دەگەن جاستار بولسا، ءۇي الۋعا مەملەكەتتەن قارجىلاي كومەك بەرمەكشىمىز»، - دەدى تۇركيا پرەزيدەنتى رەجەپ تايىپ ەردوعان.