بيىل ۇلى اقىن، كەمەڭگەر ويشىل اباي قۇنانباي ۇلىنىڭ تۋعانىنا 180 جىل تولىپ وتىر. وسى ايتۋلى مەرەيتوي اياسىندا ق ر ۇلتتىق اكادەميالىق كىتاپحاناسىنىڭ باستاماسىمەن «اباي ولەڭدەرى الەم تىلدەرىندە» اتتى حالىقارالىق چەللەندج ءوتىپ جاتىر.
ابايدىڭ مۇراسى – تەك قازاق ەلى ءۇشىن عانا ەمەس، بۇكىل ادامزات ءۇشىن باعا جەتپەس قازىنا. ونىڭ شىعارمالارىنداعى ادىلدىك، ءبىلىم، بىرلىك، ادامگەرشىلىك تۋرالى ويلارى – عاسىرلار وتسە دە ءوز قۇندىلىعىن جوعالتپايتىن، حالىقتاردى تاتۋلىققا شاقىراتىن ماڭگىلىك ءۇن.
قازاقستانداعى كۇرد قاۋىمداستىعى دا ابايدىڭ دانالىعىن، رۋحاني مۇراسىن ەرەكشە قۇرمەتتەيدى. كۇرد حالقى دا اقىن جىرلارىنان ادامدىقتىڭ، دوستىقتىڭ، ءوزارا سىيلاستىقتىڭ تەرەڭ ماعىناسىن تابادى. ابايدىڭ ءسوزى – ءبىزدىڭ دە جۇرەگىمىزگە جاقىن، ورتاق قۇندىلىقتارىمىزدىڭ ايناسى.
ابايدىڭ ۇلاعاتتى سوزدەرى:
· «ادام بولام دەسەڭىز – بەس نارسەدەن قاشىق بول، بەس نارسەگە اسىق بول.»
· «پايدا ويلاما، ار ويلا.»
· «ادامنىڭ ادامشىلىعى – جاقسى ۇستازدان.»
· «ءبىرىڭدى، قازاق، ءبىرىڭ دوس، كورمەسەڭ ءىستىڭ ءبارى بوس.»
كۇرد جانە قازاق حالقىن عاسىرلار بويى بايلانىستىرىپ كەلە جاتقان باستى قۇندىلىق – ءوزارا سىيلاستىق پەن باۋىرمالدىق. وسى ورتاق رۋحاني ساباقتاستىقتا ابايدىڭ ورنى ەرەكشە.
ۇلى ابايدىڭ مەرەيتويى بارشامىز ءۇشىن – دانالىققا باس ءيىپ، مادەنيەت پەن دوستىقتى دارىپتەيتىن ماڭىزدى ءسات.
رافيك ياكۋب ۇلى ميرزويەۆ،
قازاقستان كۇردتەرى قاۋىمداستىعى «باربانگ»