الماتىلىقتاردىڭ ۇيلەرىن توناپ كەلگەن تاعى ءبىر ۇرى ۇستالدى

ۇرىنىڭ شقو-دان كەلگەنى بەلگىلى بولدى. 

قىلمىستىق توپتى ۇستاۋ ءىس-شاراسىن كريمينالدىق پوليسيا قىزمەتكەرلەرى مەن الاتاۋ اۋداندىق پب-نىڭ جەدەل ۋاكىلدەرى جۇرگىزگەن. قازىرگى ۋاقىتتا تەرگەۋشىلەر قىلمىستىڭ باستى قاتىسۋشىسى – س.ەسىمدى ازاماتتىڭ ءۇش پاتەر ۇرلىعىنا قاتىسى بارىن دالەلدەدى، دەپ حابارلايدى Almaty-akshamy.kz Polisia.kz سايتىنا سىلتەمە جاساپ. 

«قاسكوي ستاندارتتى تىزبەك بويىنشا ارەكەت ەتتى. ءۇيدىڭ قوجايىندارى بار-جوعىن تەكسەرگەن سوڭ، تۇرعىن ۇيگە كىرگەن. بىلدىرمەي الىپ كەتۋگە بولاتىن نارسەنىڭ ءبارىن الدى – بۇل التىن بۇيىمدار، قولما-قول اقشا جانە تۇرمىستىق زاتتار. ۇيلەردىڭ بىرىنەن ۇرلانعان گەودەزيالىق قۇرال – نيەۆەلير جاسالعان ۇرلىقتىڭ بىرىنە زاتتاي ايعاق بولدى. ق ر قك-نىڭ 188-بابى 3-بولىگى بويىنشا سوتقا دەيىنگى تەرگەۋ امالدارى جۇرگىزىلۋدە»، – دەدى الماتى قالالىق پد كريمينالدىق پوليسيا باسقارماسىنىڭ باستىعى قۋاتبەك ناۋاتوۆ.

ايتپاقشى، كۇدىكتى 29 جاستاعى س.ەسىمدى ازامات شقو-دان كەلگەن، بۇرىن دا وسىعان ۇقساس قىلمىس جاساعانى ءۇشىن سوتتالعان، ال ونىڭ سىبايلاسى 33 جاستاعى ي.ەسىمدى ازامات تۇركىستان وبلىسىنىڭ تۋماسى، ۇرلانعان مۇلىكتى ساتىپ الىپ جۇرگەن. اتالعان قىلمىستىق ىستەر بويىنشا تەرگەۋ جالعاسۋدا. قىلمىستىق دۋەتتىڭ ەكى مۇشەسىنىڭ دە بۇرىن جاسالعان وسىعان ۇقساس قىلمىستارعا قاتىسى بار-جوعى تەكسەرىلەتىن بولادى.