الماتىلىقتاردىڭ اقشالاي كىرىستەرىن جىل سايىن ارتتىرىپ وتىرۋ كەرەك - ءاليحان سمايىلوۆ

الماتى سوڭعى 10 جىلدا جالاقىنىڭ ءوسۋ قارقىنى رەسپۋبليكالىق ورتاشا دەڭگەيدەن تومەندەگەن.

ق ر پرەمەر-مينيسترى ءاليحان سمايىلوۆ الماتىعا جۇمىس ساپارى بارىسىندا قالانىڭ الەۋمەتتىك-ەكونوميكالىق دامۋى ماسەلەلەرى بويىنشا كەڭەس وتكىزدى، دەپ حابارلايدى اlmaty-akshamy.kz ۇكىمەتتىڭ تەلەگرام كانالىنا سىلتەمە جاساپ.

ۇكىمەتتىڭ باسپا ءسوز قىزمەتى تاراتقان مالىمەتتەرگە قاراعاندا، جالاقىنىڭ ءوسۋ قارقىنى بويىنشا الماتى سوڭعى 10 جىلدا رەسپۋبليكالىق ورتاشا دەڭگەيدەن تومەن بولىپ كەلەدى.

«الماتىلىقتاردىڭ ناقتى اقشالاي كىرىستەرىنىڭ جىل سايىنعى ءوسۋىن قامتاماسىز ەتۋ قاجەت. بۇل – كەشەندى جۇمىس. ەڭ الدىمەن، جالاقىسى جوعارى جاڭا جۇمىس ورىندارىن قۇرۋعا جانە ينۆەستيسيالار تارتۋدىڭ جوعارى قارقىنىن ساقتاپ قالۋعا كوڭىل ءبولۋ كەرەك»، — دەدى ءاليحان سمايىلوۆ.

ونىڭ ايتۋىنشا، حالىقتىڭ تابىسىن ارتتىرۋ جۇمىستارى ينفلياسيانى تەجەۋ شارالارىن جۇزەگە اسىرۋمەن تىكەلەي بايلانىستى. سوندىقتان جەرگىلىكتى الىپساتارلاردىڭ ارەكەتى تەك قالادا عانا ەمەس، بۇكىل رەسپۋبليكا بويىنشا ازىق-تۇلىك پەن باسقا دا تاۋارلاردىڭ قۇنىنا اسەر ەتەتىندىكتەن، بازارلارداعى، ونىڭ ىشىندە «التىن ورداداعى» باعا بەلگىلەۋدى ءجىتى قاداعالاۋ قاجەت.

پرەمەر-مينيستر سونىمەن قاتار باسەكەلەستىكتى دامىتۋ ءۇشىن الماتى اگلومەراسياسىنىڭ شىعىس جانە سولتۇستىك بولىكتەرىندە قوسىمشا ساۋدا الاڭدارىن قۇرۋ ماسەلەسىن پىسىقتاۋ، سونداي-اق دەلدالدىق سحەمالاردى انىقتاۋ بويىنشا وڭىرلىك كوميسسيانىڭ ءتيىمدى جۇمىسىن قامتاماسىز ەتۋ قاجەتتىگىن ايتتى.