مەگاپوليستە كەزەكتە تۇرعانداردىڭ سانى ارتىپ كەلەدى. بۇل تۋرالى وڭىرلىك كوممۋنيكاسيالار قىزمەتىنىڭ باسپا ءسوز كونفەرەنسياسىندا الماتى قالالىق جايلى ورتا باسقارماسىنىڭ باسشىسى ساپار نۇراشيەۆ حابارلادى. ول بيىل قانشا قالا تۇرعىنىنىڭ باسپانالى بولعانىن ايتتى، دەپ حابارلايدى almaty-akshamy.kz
2021 جىلى كەزەكتە تۇرعانداردىڭ ءتىزىمى «نۇرلى جەر» مەملەكەتتىك باعدارلاماسى اياسىندا مىڭداعان قالا تۇرعىنى الەۋمەتتىك تۇرعىن ۇيمەن قامتاماسىز ەتىلگەندىكتەن، ايتارلىقتاي قىسقاردى.
«بيىل جالپى اۋدانى 248،5 مىڭ شارشى مەتر نەمەسە 3 959 پاتەر پايدالانۋعا بەرۋ جوسپارى بەكىتىلدى، ونىڭ ىشىندە 1 892 پاتەر «ساتىپ الۋ قۇقىعىنسىز جالعا بەرۋ» جەلىسى بويىنشا جانە 2 067 پاتەر «بانك سالىمشىلارى مەن جاو-دا كەزەكتە تۇرعاندار ءۇشىن كرەديتتىك تۇرعىن ءۇي» جەلىسى بويىنشا. ءبىز «وتباسى بانكىمەن» بىرلەسىپ، مەملەكەتتىك باعدارلامانى جۇزەگە اسىرىپ جاتىرمىز»، - دەدى ساپار نۇراشيەۆ.
مىسالى، بيىل ناۋرىزباي اۋدانىنىڭ «الما سيتي-5» تك-دە 37 ءۇي نەمەسە 1 110 پاتەر سالىندى. وسى اۋداندا ينۆەستور قارجىسى ەسەبىنەن «كازاحستروي» ج ش س 1 200 ورىندى مەكتەپتىڭ قۇرىلىسى باستالدى.
سونىمەن قاتار، الاتاۋ اۋدانىنداعى «مادەنيەت» تك-دە ءتورت ءۇي نەمەسە 144 پاتەر سالىندى، مۇندا 160 ورىندىق بالاباقشانىڭ قۇرىلىسى جوسپارلانعان.
«بۇل ۇيلەردىڭ بارلىعى پايدالانۋعا بەرىلدى، كەزەكتە تۇرعانداردىڭ ءبىر بولىگى پاتەرلەرىن الدى. مىسالى، «الما سيتي-5» تۇرعىن ءۇي كەشەنىنە 227 از قامتىلعان كوپ بالالى وتباسى جانە 440 كەزەكتە تۇرعان «وتباسى بانكىنىڭ» سالىمشىلارى قونىستاندى»، - دەپ جالعاستىردى ءسوزىن ساپار نۇراشيەۆ.
قازىرگى ۋاقىتتا تۇركسىب اۋدانىنىڭ «جاس قانات-2» تك قۇرىلىس-مونتاجداۋ جۇمىستارى جالعاسۋدا. مۇندا ەگجەي-تەگجەيلى جوسپارلاۋ جوباسىمەن توعىز قاباتتى 41 ءۇيدىڭ قۇرىلىسى قاراستىرىلعان، ونىڭ ىشىندە جىل سوڭىنا دەيىن 2 705 پاتەرلىك 35 ءۇي سالىنادى. قالعان التى كوپ قاباتتى ءۇي 2022 جىلى سالىنادى.
«جاس قانات-2» تك اۋماعىندا 260 ورىندىق بالاباقشا، 340 ادام قابىلدايتىن ەمحانا جانە 1 500 ورىندىق مەكتەپ سالىنادى. قۇرىلىس 2022-2023 جىلدارى اياقتالادى.
ءسوزىنىڭ سوڭىندا س. نۇراشيەۆ الماتىدا قالا تۇرعىندارىنىڭ تۇرعىن ءۇي جاعدايىن جاقسارتۋ بويىنشا جۇمىس جالعاساتىنىن، ويتكەنى بۇل قالا اكىمدىگى جۇمىسىنىڭ ستراتەگيالىق باعىتتارىنىڭ ءبىرى ەكەنىن اتاپ ءوتتى.