سيترۋستىق وسىمدىكتىڭ گۇلدەپ، بۇرشىك جارىپ، كوگەرۋى مەن ءپىسىپ جەتىلۋىنە 9 ايداي ۋاقىت كەتەدى
الماتى تۇرعىنى اننا باشيرسكايا قالادا العاشقى بولىپ ليمون وسىرگەن. قوجالىق يەسى 26 جىلدان بەرى قاجىرلى قىزمەت ەتىپ، ەندى سول ەڭبەگىنىڭ جەمىسىن تەرىپ الىپ ءجۇر. ول وسىرگەن ليموناريي ءار 9 ايدا 5-6 توننا ءونىم بەرەدى، دەپ حابارلايدى Almaty-akshamy.kz
ونىڭ كوشەتى جىلىجايعا 1986 جىلى وزبەكستاننان اكەلىنگەن ەكەن. باستاپقىدا تروپيكالىق ايماقتاردا وسەتىن جەمىستى الماتىدا جەرسىندىرۋ وڭايعا سوقپاپتى. دەسە دە، ماماندار بۇگىندە ليموندى باپتاۋدىڭ قىر-سىرىن ابدەن مەڭگەرىپ العان.
ليمون اعاشىنىڭ نىعايىپ، جەمىس بەرۋى ءۇشىن ونى 5 جىلعا دەيىن كۇتىپ-باپتاۋ كەرەك. ال ءبىر ءتۇپتىڭ وزىنەن ورتا ەسەپپەن 50-60 كەلىگە دەيىن ليمون تەرىپ الۋعا بولادى. بۇل وسىمدىكتىڭ ەڭ ءبىر ارتىقشىلىعى – ونىڭ ءونىمى جىلدان-جىلعا كوبەيە بەرەدى.
ليموندى باپتاۋ ءۇشىن اسا توزىمدىلىك پەن ەڭبەكسۇيگىشتىك كەرەك. سەبەبى ماماندار ايلار بويعى جۇمىستىڭ ناتيجەسىن نەگىزىنەن قازان-اقپان ايلارىندا عانا كورەدى ەكەن.
«جىلىنا ءبىر رەت گۇلدەيدى. ءقازىر ءدال ءونىم جينايتىن كەزەڭ باستالدى. كەيدە ساۋىرگە دەيىن ليمون تەرىپ الۋعا بولادى. ودان كەيىن اعاشتىڭ جاپىراقتارى ءتۇسىپ، قايتا كوكتەيدى. جالپى جەمىس بەرۋ پروسەسى قايتا باستالادى»، – دەدى ليموناريي قىزمەتكەرى سابيليا جاقسىبايەۆا.
ليموناريي ونىمدەرىن تەك جىلىجايعا تيەسىلى دۇكەننەن عانا ساتىپ الۋعا بولادى. قوجالىق يەلەرى ودان وزگە، ءۇي وسىمدىكتەرى جانە اسكوك پەن اقجەلكەن وسىرەدى. ءار وسىمدىككە ەرەكشە كۇتىم قاجەت دەيدى جىلىجاي قىزمەتكەرلەرى.
كاسىپ يەلەرى ليموننىڭ بۇل ءتۇرىن اسىلداندىرىپ، جوعارعى سورتىن ءوسىرۋدى ماقسات ەتىپ وتىر. ونىمەن قوسا، قالاداعى ليموناريي سانىن كوبەيتپەك نيەتتە.
ەلىمىزگە ليمون نەگىزىنەن وزبەكستان، تاجىكستان، گرەكيادان اكەلىنەدى.