الماتىلىقتاردى الداپ سوققان «دوڭگەلەك ساتۋشى» ۇستالدى

كۇدىكتى ۋاقىتشا ۇستاۋ يزولياتورىنا قامالدى.

الماتىلىقتاردى 15 ملن تەڭگەگە الداپ سوققان «دوڭگەلەك ساتۋشى» قولعا ءتۇستى، دەپ حابارلايدى Almaty-akshamy.kz Polisia.kz-كە سىلتەمە جاساپ.

قاسكوي ءوزىن دوڭگەلەكتەر مەن ديسكتەردى تەك كوتەرمە جەتكىزۋشى رەتىندە ۇسىندى. الام دەۋشىلەرگە تىكەلەي قويمادان ارزان باعاداعى تاۋاردى الىپ بەرۋگە ۋادە بەرگەن.

«30 جاستاعى ە. ەسىمدى ازامات تاۋار تولەمىن الدىن الا العان. ول «ساتىپ الۋدىڭ» كولەمىنە قاراي 500 مىڭنان 6 ميلليون تەڭگەگە دەيىنگى قارجى بولعان. ەر ادام ۋادەسىن ورىنداماعان سوڭ، الدانعان 12 ازامات پوليسياعا ارىز جازعان. قىلمىستىق ءىس ق ر قك-نىڭ 190-بابى 3-بولىگى (الاياقتىق) بويىنشا تەرگەلۋدە. تەرگەۋدىڭ قازىرگى كەزەڭىندە جابىرلەنۋشىلەرگە كەلتىرىلگەن شىعىننىڭ جالپى سوماسى 15 ميلليون تەڭگەدەن اسادى. كۇدىكتى ۋاقىتشا ۇستاۋ يزولياتورىنا قامالدى»، - دەدى الاتاۋ اۋداندىق پب باستىعى ءىلياس ومىرسەرىكوۆ.

پوليسيا تەرگەۋ قاجەتتىلىگىن ەسكەرە وتىرىپ، ە. ەسىمدى ازاماتتىڭ قىلمىستىق ارەكەتتەرىنەن زارداپ شەككەن ادامداردىڭ مىنا تەلەفوندارعا حابارلاسۋىن سۇرايدى: 8-700-300-99-96؛ 8-778-626-11-08.