الماتىلىقتار «الماتى - ءبىزدىڭ ورتاق ءۇيىمىز» كامپانياسى اياسىندا ءوتىپ جاتقان «جاسىل اۋلا» ناۋقانى ارقىلى تەگىن كوشەتتەر الدى، دەپ حابارلايدى almaty-akshamy.kz
«الماتى - ءبىزدىڭ ورتاق ءۇيىمىز» كامپانياسى اياسىندا الماتى قالاسى ەكولوگيا جانە قورشاعان ورتا باسقارماسى وتىنىمدەر بويىنشا كوشەتتەردى تاراتتى.
«جاسىل اۋلا» ناۋقانى اياسىندا كوشەتتەر كوپقاباتتى ۇيلەردىڭ اۋلاسى مەن قوعامدىق كەڭىستىكتەردە وتىرعىزۋ ءۇشىن بەرىلدى.
جتق جەكە سەكتورى مەن باۋ-باقشا سەرىكتەستىكتەرىنىڭ، سونداي-اق زاڭدى تۇلعالاردىڭ اۋماعىندا وتىرعىزۋ ءۇشىن كوشەتتەر بەرۋ كوزدەلمەگەن.
ناۋقاننىڭ ءبىرىنشى كەزەڭىنىڭ قورىتىندىسى بويىنشا 500-گە جۋىق ءوتىنىم كەلىپ ءتۇستى، ونىڭ 200-دەن استامى ماقۇلداندى. قالا تۇرعىندارى 2 مىڭنان استام كۇل، تال، كاتالپا، گيبيسكۋس، الما جانە قاراعاش كوشەتتەرىن تەگىن الدى.
جىل سايىن كوپپاتەرلى ۇيلەر مەن جالپى اۋماقتاردىڭ اۋلالارىن كوگالداندىرۋعا نيەت بىلدىرۋشىلەر سانى ارتىپ كەلەدى. جىل سايىن «جاسىل اۋلا» ناۋقانىنا قاتىساتىن تۇرعىندار بار.
«مەن تۇركسىب اۋدانى، «جۇلدىز» شاعىن اۋدانىندا تۇرامىن. مەن ءوز اۋلامدى كوگالداندىرۋ ءۇشىن ءتۇرلى كوشەتتىڭ 15 داناسىن الدىم. بۇل اكسياعا قاتىسۋ - ۇلكەن جاۋاپكەرشىلىك، ويتكەنى اعاشتى كۇتىپ-باپتاۋ جانە ءوسىرۋ قاجەت. ءبىز قالانىڭ جاسىل قورىن دامىتۋىمىز كەرەك، وسىنداي ءىس – شارالار كوبىرەك بولسا دەگەن قالاۋىم بار»، - دەدى تۇركسىب اۋدانىنىڭ تۇرعىنى الەنا باركالوۆا.
ەستەرىڭىزگە سالا كەتەيىك، اكسياعا قاتىسۋ ءۇشىن وتىنىمدەردى قابىلداۋ 15 ساۋىرگە دەيىن جالعاسادى. ەكىنشى كەزەڭدە كوشەتتەردى تاراتۋ 20-21 ساۋىردە ساعات 10:00-دەن 15:00-گە دەيىن الماتى قالاسى، اۋەزوۆ اۋدانى، يۋريي كيم كوشەسى، 9ء-ۇي («Eco Almaty» ج ش س) مەكەنجايى بويىنشا جۇرگىزىلەدى. انىقتاما تەلەفوندارى: +7 707 546 1770، +7 727 390 41 17. قوڭىراۋلار جۇمىس كۇندەرى ساعات 9:00-دەن 18:00-گە دەيىن قابىلدانادى.