الماتى وبلىسىنىڭ تاۋلارىندا 15 – 18 ءساۋىر كۇندەرى قار كوشكىنى ءجۇرۋ ءقاۋپى ساقتالادى.
قار كوشكىنى قاۋپىنە بايلانىستى الماتى وبلىسىنىڭ توتەنشە جاعدايلار دەپارتامەنتى ازاماتتاردان، تۋريستەر مەن دەمالۋشىلاردان قارلى بەتكەيگە شىقپاۋدى سۇراپ، تاۋلى جەردە بۇكىل قاۋىپسىزدىك شارالارىن ساقتاۋعا شاقىردى، دەپ حابارلايدى Almaty-akshamy.kz.
«الماتى وبلىسىنىڭ اۋماعىندا ىلە الاتاۋى تاۋلارىنىڭ وڭتۇستىك بەتكەيىندە ەڭبەكشىقازاق، تالعار جانە قاراساي اۋداندارىندا كوشكىن ءقاۋپى بار 55 ۋچاسكە بار. نەگىزىنەن قار كوشكىنىنىڭ ءتۇسۋى تەمپەراتۋرا فونىنىڭ جوعارىلاۋىنا جانە جاڭبىر مەن قاردىڭ مول تۇسۋىنە بايلانىستى بولادى»، - دەپ ەسكەرتتى الماتى وبلىسىنىڭ توتەنشە جاعدايلار دەپارتامەنتى.
سينوپتيكتەردىڭ بولجاۋىنشا وڭىردە اۋا تەمپەراتۋراسى +18 گرادۋسقا دەيىن كۇن جىلىنادى.