ءوتىنىش بەرۋدىڭ ءۇش ءتۇرى بار
الماتىلىقتار ەلىمىزدە شەتەلدىك كولىكتەردى زاڭداستىرۋعا قاتىستى ويلارىمەن بولىسۋدە، دەپ حابارلايدى Almaty-akshamy.kz قالالىق پوليسيا دەپارتامەنتىنە سىلتەمە جاساپ.
ارنايى حقو-عا كىشكەنتاي ۇلىن ەرتە كەلگەن الماتىلىق ماحاببات ەسىمدى ايەل كولىكتەردى زاڭداستىرۋ پروسەسى تەز وتكەنىن ايتتى.
«ءبىز راسىمدەدىك، ءقازىر ءنومىر الىپ جاتىرمىز. جالپى، بۇل پروسەسس وتە تەز ءوتتى. ءبىزدىڭ كولىكتەر قازاقستاندا بولعاندىقتان، ۇكىمەت ولاردى زاڭداستىرۋعا مۇمكىندىك بەردى. بۇل دۇرىس بولدى. ءبىز كولىكتى اقشاعا ساتىپ الدىق، بۇل اقشا ءقازىر ءوزىن اقتاپ وتىر. مەملەكەتتىك باج سالىعى دا ورىندى»، – دەدى ماحاببات.
الماتى تۇرعىنى دميتريي ءقازىر شەتەلدىك كولىكتەر كوبەيگەن تۇستا باستالعان جاقسى ناۋقان ەكەنىن ايتتى.
«مەن ونلاين ءوتىنىش بەردىم، كەيىن كولىكتى زاڭداستىرۋعا بولاتىنى جونىندە حابارلاما كەلدى. كەلدىم، ءوتىنىشتى الدىم، تەكسەرۋ راسىمىنەن ءوتسىن دەدى. وتە جاقسى ناۋقان، اسىرەسە، ءقازىر شەتەلدىك كولىكتەر وتە كوپ ۋاقىتتا. ولاردى زاڭداستىرسا، جاقسى بولار ەدى. تيىسىنشە، بارلىعى سالىق تولەيتىن بولادى، كولىك نومىرلەرى قازاقستاندا تىركەلەتىندىكتەن، جول ەرەجەسىن بۇزۋ دا ازايادى»، - دەدى دميتريي.
ال شەتەلدەن اكەلىنگەن كولىكتەردى زاڭداستىرۋ جۇمىستارىنىڭ تيىمدىلىگى جايىندا الماتى قالالىق اكىمشىلىك پوليسيا باسقارماسىنىڭ باستىعى، پوليسيا پولكوۆنيگى نۇرلان امانبەك ايتىپ بەردى.
«ق ر پرەزيدەنتىنىڭ تاپسىرماسىنا سايكەس، ەۋرووداق ەلدەرىنەن اكەلىنگەن كولىكتەردى زاڭداستىرۋ تۋرالى شەشىم قابىلداندى. ءوتىنىش بەرۋدىڭ ءۇش ءتۇرى بار: egov.kz پورتالى ارقىلى، ەكىنشى دەڭگەيلى بانك قوسىمشاسى ارقىلى، سونداي-اق، ارنايى حقو-عا حابارلاسۋ ارقىلى. بۇل جۇمىستار وتە ءتيىمدى. ءاربىر ءوتىنىش جەكە وڭدەلەدى. زاڭداستىرۋ اياقتالعانشا بۇل پروسەسس جەتىلدىرىلەتىن بولادى. ەڭ باستىسى، ازاماتتار ريزا»، - دەدى ول.
الماتى قالالىق پوليسيا دەپارتامەنتىنىڭ مالىمەتىنشە، بۇگىن الماتىدا تاڭ اتقاننان بەرى ارنايى حالىققا قىزمەت كورسەتۋ ورتالىقتارىندا شەتەلدەن اكەلىنگەن 10 اۆتوكولىك تىركەلدى.
ەسكە سالساق، بۇگىننەن باستاپ ەلىمىزدە شەتەلدىك اۆتوكولىكتەردى زاڭداستىرۋ جۇمىستارى باستالدى.
شەتەلدىك كولىكتى زاڭداستىرۋ ناۋقانى اياسىندا العاشقى شەتەلدىك كولىك الماتىدا تىركەلدى.
سونداي-اق بۇگىن الماتىدا شەتەلدىك كولىكتەردى زاڭداستىرۋ ءۇشىن 84 ادام حقو-عا جۇگىندى.