بورىشكەرلەردىڭ اۆتوموبيلدەرى "سەرگەك" كامەرالارىنىڭ كومەگىمەن انىقتالادى.
الماتىدا سالىق بەرەشەگى بار بورىشكەرلەردىڭ كولىكتەرى ايىپپۇل تۇراعىنا قويىلادى، دەپ حابارلايدى Almaty-akshamy.kz
بۇل باعىتتاعى جۇمىس جالعاسۋدا.
سوندىقتان شاھاردا اۆتوكولىك قۇرالدارى بويىنشا سالىق بەرەشەگىن ءوندىرىپ الۋ ماقساتىندا قالالىق پوليسيا دەپارتامەنتىمەن جانە جەكە سوت ورىنداۋشىلارىنىڭ وڭىرلىك پالاتاسىمەن بىرلەسىپ "بورىشكەر" جەدەل-الدىن الۋ ءىس-شاراسى وتكىزىلۋدە.
بۇل تۋرالى قالالىق مەملەكەتتىك كىرىستەر دەپارتامەنتىنىڭ باسپا ءسوز قىزمەتى حابارلادى.
جەكە سوت ورىنداۋشىلارىنىڭ قاۋلىسى بار بورىشكەرلەردىڭ اۆتوموبيلدەرى "سەرگەك" كامەرالارىنىڭ كومەگىمەن انىقتالادى جانە بەرەشەك تولىق وتەلگەنگە دەيىن ايىپپۇل تۇراعىنا قويىلادى.
"بۇگىنگى تاڭدا كولىك قۇرالدارىنا سالىناتىن سالىق بويىنشا بەرەشەك 4،9 ملرد تەڭگەنى قۇرايدى. بەرەشەكتىڭ نەگىزگى بولىگى قوزعالتقىشىنىڭ كولەمى 4000 تەكشە سم-دەن اساتىن اۆتوكولىكتەرگە تيەسىلى"، – دەپ حابارلادى مكد.
ءبىر اپتا ىشىندە جيىرمادان اسا كولىك، سونىڭ ىشىندە Porshe cayenne، Toyota Land Cruiser، Mercedes-Benz جانە ت. ب. اۆتولار ايىپپۇل تۇراعىنا قويىلدى.
الماتى قالاسى بويىنشا مكد اۆتوكولىك يەلەرىن ايىپپۇل تۇراعىنا قاماۋدى جانە سوت ورىنداۋشىلارىنىڭ قىزمەتتەرىنە اقى تولەۋ بويىنشا جايسىز جاعدايلاردى بولدىرماۋ ءۇشىن جاقىن ارادا سالىق بەرەشەگىن وتەۋگە شاقىرادى.
سالىق بەرەشەگىن مكك "ە-Salyq-Azamat" ءموبيلدى قوسىمشاسىنىڭ كومەگىمەن جانە ءوز بەتىنشە www.kgd.kz ينتەرنەت-رەسۋرستا، سونداي-اق ەكىنشى دەڭگەيدەگى بانكتەردىڭ ءموبيلدى قوسىمشاسىندا تەكسەرۋگە بولادى.