Facebook جەلىسىندە تازالانباعان وزەن ءتۇبىنىڭ سۋرەتتەرى پايدا بولدى
ەسەنتاي وزەنى ارناسىندا ءقازىر سۋ جوق جانە ءتۇبى توپىراق، تۇنبا، باسقا دا شوگىندىلەردەن تازارتىلماعان، دەپ حابارلايدى Almaty-akshamy.kz قازاقپارات سايتىنا سىلتەمە جاساپ.
«ساتپايەۆتان تومەن ۆەسنوۆكا (ەسەنتاي) وسىلاي كوڭىلسىز كورىنەدى»، - دەپ جازدى اۆتور فوتو استىندا. جەلى قولدانۋشىلارى دا وزدەرىنىڭ نارازىلىعىن قالدىردى.
«ۆەسنوۆكا سۇمدىق... ميلليون تۇرعىنى بار قالانىڭ ورتالىعى وسىنداي... ال-فارابيدەن جوعارى جانە تومەن ءدال وسىلاي كورىنەدى... جاز بويى سۋ بولعان جوق... جازدا ەشتەڭە جاسالمادى... سۋ دا جوق، اعاشتى سۋارۋ دا جوق... ال-فارابيدەن جوعارى قۇرعاق كوشەتتەر الىنىپ، ورنىنا جاڭا كوشەتتەر وتىرعىزىلدى، ءبىراق سۋارىلمايدى... قۇرمانعازى كوشەسىنىڭ تومەن جاعىنداعى باتپاقتانعان ۆەسنوۆكادان جامان ءيىس شىعادى»، - دەپ جازدى تۇرعىندار.
بۇل ماسەلە بويىنشا الماتى قالاسىنىڭ جاسىل ەكونوميكا باسقارماسىندا جاۋاپ بەردى. باسقارمانىڭ مالىمەتىنشە، اتالعان ۋچاسكەدەگى ەسەنتاي وزەنىنىڭ ارناسىن رەكونسترۋكسياعا جوبالىق-سمەتالىق قۇجاتتاما ازىرلەۋ ءۇشىن قاراجات بولۋگە بيۋدجەتتىك ءوتىنىم بەرىلەدى.
«قاراجات بولىنگەن كەزدە جوبانى ازىرلەۋ جۇمىستارى باستالادى. ءقازىر سۋ بولگىشتەن جاماقايەۆ كوشەسىنە دەيىن ەسەنتاي وزەنى ارناسىنىڭ سۋ قورعاۋ بەلدەۋى ۋچاسكەسىن رەكونسترۋكسيا جۇمىسى جۇرگىزىلىپ جاتىر. وسىعان بايلانىستى ەسەنتاي وزەنى سۋىنىڭ ءبىر بولىگى كىشى الماتى وزەنىنە جىبەرىلەدى. جوعارىدا ايتىلعاندارعا بايلانىستى سۋ دەڭگەيى ۋاقىتشا تومەندەدى. جۇمىستار قاراشا ايىنىڭ سوڭىندا اياقتالادى»، - دەپ ءتۇسىندىردى باسقارما.
ۇلكەن الماتى جانە ەسەنتاي وزەندەرىنىڭ ارنالارىن تازارتۋ جونىندەگى باعدارلامانىڭ اكىمشىسى - «قازسەلدەنقورعاۋ» مم.